Kum 2023-ah ZPM-in sorkarna a chan tawh ngei a beiseiawm - ZPM President

ZPM president Lalliansawta chuan, kum 2023 inthlanpuiah ZPM-in sorkarna a chan tawh ngei a beiseiawm hle nia sawiin, ngaihtuahna thar hmang turin mipui a sáwm.

Lalliansawta hian nimin khan Siahaa an party pisaa inkhawmah thu sawiin, "ZPM party hian kum 2023-ah chuan Mizoramah sorkarna kan chan tawh ngei a beiseiawm tawh hle a, party dangte hi an ṭhatna chin a tàwp titih tawh. India ram laili chu sawi loh, hmarchhaka kan unau state dangte pawh kan phâk loh nasatzia en hian hruaitu ṭha leh rorelna dik leh fel tak nen ram kan hruai hi a ṭul tawh a, Zoram mipui leh Mara ram mipuite ngaihtuahna thar hmang turin ka sáwm che u a ni," a ti.

ZPM President chuan, MADC inthlan zawh tâk chuh turin ZPM tan chuan harsatna chin tam tak a awm tih sawiin, "MADC-a kan dinhmunte thlirin sorkarna siam thei kan ni lo tih a chiang a, chutiang karah chuan huaisen taka ram leh hnam tana inpekna tak tak thinlung pua ZPM candidate nia dingte kan chhuang tak zet a ni," a ti a; tuna Mara rama ZPM hruaitute leh MDC candidate-te chu ZPM chi kûi ṭiaktu an nih thu a sawi.

ZPM thuchhuah chuan, an party President hian ZPM zawm thar mi 142 a lâwm lut niin a tarlang.