KHAWTHLIR

Insawifiah turin ti
MPCC Political Affairs Committee (PAC) chuan nimin khan ṭhutkhawm hmanhmawh an nei a; Mara Autonomous District Council huam chhunga district Congress hotute leh Congress MDC palite chu Congress party PAC duh dan kalha MNF nena sorkar siam tura thutlukna an siam chungchangah insawifiah tura hriattir nghal an rêl. Show cause notice pe nghal turin MPCC Disciplinary Action Committee an hriattir nghal a ni.

NSS thisen pe
Modern English Higher Secondary School NSS volunteer-te chuan nimin khan Civil Hospital, Aizawl blood bank-ah thisen pek an huaihawt a, thisen unit 11 pein, petute mipa pasarih leh hmeichhia pali an ni.

Kawlphetha awm dawn lo
Power & Electricity department chuan vawiin hian Zuangtui Power Sub-Station-ah hna an thawh dawn avangin zing dar 9:30 leh tlai dar 4 inkarah kawlphetha an pe chhuak dawn lo a; Aizawl hmar lama veng/khua ṭhenkhatin kawlphetha an hmu dawn lo tih an tarlang. Power hmu lo turte chu - Bawngkawn, Durtlang, Muthi, Ramhlun pumpui, Ramthar Tlangveng, Selesih, Sihphir, Tuirial, Ṭhuampui, Zemabawk leh Zuangtui te a ni.

MLA-in pek tiam
Aizawl South-I bialtu MLA C Lalsawivunga chuan nimin khan Bethlehem Vengthlang H/S-in HSLC pass tharte lawmpuina an buatsaih a hmanpui a, Mizo ṭhalai zingah all India service-a lut an tlêm chu manganthlâk a tih thu sawiin, a bial chhung mi all India service-a inziak tling thei an awm chuan an senso zawng zawng pêk lêt a intiam tawhah a din reng thu a sawi.

Ráltlân ṭanpui
Health minister Dr R Lalthangliana chuan nimin khan Myanmar Refugee Relief Committee, Mizoram hruaitute hnenah ṭanpuina a hlân.

Assembly exhibition
Assembly House Annexe-a Mizoram Legislative Assembly Golden Jubilee Exhibition buatsaih chu a duh apiang tana tlawh theih turin tun thla (May) chhung atan pawhsei a ni a; tlawh tumte chu office hun chhungin Assembly Secretariat-ah inhriattir hmasak tur a ni.