Mizoram zirna leh syllabus-te A hniam bik lo - Education Minister

Mizo High School chuan nimin khan an sikul tualah Day of Govemiknights an hmang a, kum thum chhunga an sikul aṭanga HSLC pass ṭhate an chawimawi. He huna khuallian School Education minister Lalchhandama Ralte chuan, Mizoram zirna leh zirlai (syllabus)-te chu a hniam bik lo niin a sawi.

School Education Minister chuan, Mizoramin syllabus a hman chu CBSE syllabus nen a inang vek nia sawiin, "Zirtirtute pawh national norms-ah qualified an tih chin vek, train chhuak vek an ni. Hetiang a nih avang hian all India level-a inelnaah pawh Mizo nula tlangvalte chu a langsárah an tel thei. All India standard-ah Mizoram zirna a hniam bik lo a, syllabus-te pawh a hniam bik lo a, kan thluak hian India hnam dangte a pha a ni," a ti.

Lalchhandama Ralte chuan, India ram pum huap inelna exam duhte tan state sorkarin remchanna a siamsak mek tih sawiin, "Rei lo têah sorkar hnaa a fawng chelhtu official-ah hnam dang hlir an awm chuan ram leh hnam tan a pawi dawn," a ti a; UPSC leh hna sang exam dangte chu Mizo thluakin a pha a ni tih hriaa ngaihtuahna hmang turin zirlaite a fuih.

Kum 2020 aṭangin Covid-19 hripuiin khawvel pum a tibuai tih sawiin Lalchhandama chuan, "Kum thum kal ta chhungin Mizoram zirna a theih ang angin sorkarin a kalpui a, online class kalpui a ni a, zirlaite hi regular class kal nan thla hnih vel chauh hun nei an ni a, an khawngaihthlak hle," a ti a; hripui avanga harsatna a awm chhungin India ramah Mizoram chu kum thum chhunga offline mode-a exam thei awm chhun a nih thu leh chu chu ṭan rualna leh thuawihna vang a nih thu a sawi.

School Education Minister chuan, zirna leh nationalism-ah harh thar turin zirlaite a sáwm a, "NEP 2020-in mahni hnam ze mila zirna kalpui a phal angin pawl VI-VIII zirlaiah 'Zo nun' tih chu additional subject-ah siam a ni a, zirlaite'n mahni hnam an hriat chian a, an zahpui lohna tura buatsaih a ni," a ti.

Mizo HS Day of Govemiknights hmannaah hian kum 1972-a zir chhuakte chu khualzahawm an ni a, Mizo H/S-a thawk zirtirtute leh zirlaite telin, kum 1997-a zirlaite'n an kaihruai a ni.