Armed Police-in inkhawmpui an hmang

Mizoram Armed Police Association (MAPA) chuan nimin khan Aijal Club-ah General Assembly vawi hnihna an hmang a; khuallian minister of state Robert Romawia Royte chuan, ram tan police-te an pawimawh thu a sawi.

Robert Romawia chuan, Mizoram chu state rálmuang ber tia hriat ṭhin a nih thu sawiin, "Ram a râlmuan lai chuan police pawimawhna a langsar lo a ni mai thei a, tun hnaiah ramri buaiah armed police pawimawhna mi tinin kan hria. Indaih lo tak karah resource mobilisation rem hre taka buatsaih a ni a, ramri buaiah police-te'n an thawh hlâwk hle. Mizoram police inpekna hi ram anga kan chhuan a ni," a ti.

Ram leh hnam humhalh tura an thawhnaah police-te'n chawimawi an phu thu sawiin Minister chuan, "Ram hmingṭhatna hi mi tlemtê hnathawh vang a ni ṭhin. Police-te hmingṭhatna chu ram hmingṭhatna a ni a, sorkarin a chhuang a, hnamin a chhuang bawk," a ti a; Mizoram police-te chêt ṭhat avangin inchhuanna ṭha thinlungah mipuiin an neih ṭhin thu a sawi.

Khualzahawm IGP (Hqrs) John Neihlaia pawhin thu sawiin, armed police-te chu neitu chan changa thawk zel tur leh ram tana rawngbawltu ni zel turin a fuih a, "Hnain a kaihhnawih thilah tih tur ṭha zawk kan hriatte mi dang tana khêk lo a, mahniin hmalak zel tur. Social media hman thiam a, sorkar hnathawkte'n an tih tur leh tih loh tur hriat a pawimawh," a ti.

MAPA inkhawmpuiah hian an member, constable aṭanga inspector zinga thi mi 238 sûnna hun hman a ni a, hruaitu hluite chawimawina neih a ni bawk. Chawhnu lamah rorel leh hruaitu thlanna hun an hmang a ni.