Zirtirtu lâkah a tling ngei lâk a nih theih nan MZP-in hmalak an rêl
Mizo Zirlai Pawl (MZP) chuan nimin khan MZP Conference Hall-ah Federal Council Sitting vawi 54-na an nei a; sorkarin zirtirtu a lakah a tling leh tlâk (qualify) ngei lak a nih theih nan leh sorkar hna thar lak reng rengah dik taka lak a nih theih nan hmalak an rél.
MZP Federal Council ṭhutkhawm hi MZP Gen.Hqrs vice president Andrew F Lalramnghaka'n a kaihruai a; "Sorkarin zirtirtu hna a lakah hian tling leh tlak (qualify) ngei lak a nih theih nan MZP-in hma la rawh se," an tih bakah, "Sorkar hna thar lâk rêng rêngah dik taka lak a nih theih nan MZP-in hma la rawh se," an ti.
MZP chuan, Mizoram puma zirnain hma a sawn theih nan sorkar enkawl sikul leh college-a zirtirtu leh zirlai awm dan zir chian an rél a, "Mizoram sorkarin sikul zirtirtu, Transfer & Posting Rules a neih mek hi a taka hman a nih theih nan MZP-in hma la rawh se," an ti a; National Institute of Open Schooling-a zirlaite harsatna, fee leh result chungchang sutkian a nih theih nan leh eirawngbawlna gas subsidy chungchanga harsatna mipuiin an tawhte chinfel a nih theih nan hmalak an rél bawk.
MZP president Lalnunmawia Pautu chuan, MZP chu sorkar do ngawr ngawr tur an ni lo tih sawiin, "Thil ṭha an tih chuan sorkar thawhpui tur leh an kalsual tur venga an tih dik lohte dodal tur kan ni a, kan hmalaknaah ram leh hnam himna kan dah pawimawh hmasa ber tur a ni. Politics thli chhia leh inchirhthehna lak aṭangin i fimkhur ang u," a ti.