July-October thla chhung Aizawlah lei laih phal lo
Aizawl Municipal Corporation (AMC) chuan fûr laiin Aizawlah lei laih vanga chhiatna a thlen loh nan kumin July aṭanga October thla chhungin lei laih leh leivûng hmanga ruam/kawr chhûn khah khap a nih thu a puang.
AMC commissioner H Lalhmingthanga chuan nimin khan hriattirna chhuahin, "Mizoramah furpui laia lei laih avangin chhiatna leh nunna chàn palhna a thleng tawh ṭhin a. Hetiang hi a thlen tawh lohna turin AMC chuan lei laih phal loh hun siam ṭulin a hria," a ti a; July-October 2022 chhunga lei laih phal lohna thupek chu AMC (Site Development & Slope Modification) Regulations, 2017-a Regulation 10-in thuneihna a pek anga chhuah a nih thu leh thupek zâwm lote chu hrem theih an nih thu a tarlang.