NE-te CUET-ah ngaihhnathiam
University Grants Commission (UGC) chuan, kumin aṭanga Common University Entrance Test (CUET)-ah India hmarchhak bial leh tlang ram hmun danga mite tan ngaihhnathiam a nih dawn thu leh university/college-te chu an kal dan ṭhin pangngaia an kal theih dawn thu a tarlang.
Hemi chungchangah hian UGC chuan May 19, 2022 khan Mizoram University bakah, Sikkim University, Rajiv Gandhi University, Manipur University, Assam University, Nagaland University, Tripura University, NEHU leh HNB Garhwal University (Uttarakhand) registrar-te hnenah lehkha a thawn a ni.
UGC lehkhaa a lan danin, university pakuaa affiliated college-te chu tlang ram leh hmun hla zuala awmte a ni a, tun hnaiah ruahsur nasa avanga tuilian leh leimin a tam avangin college-a lut thar tur zirlaite’n CUET hmachhawn turin harsatna an tawh theih avangin academic session 2022-23 atan bik CUET paltlang kher a ngai lo tih UGC chuan university-te a hriattir a ni.
Vanglaini palai zawhna chhangin MZU registrar Prof. Lalnundanga chuan, UGC-in lehkha a thawn chhuah chu university a ziah lana affiliated college-te tan a nih thu a sawi a, “PUC hi chu MZU constituent college a nih avangin PUC-a lut duhte tan chuan CUET hi tih ngei a la ngai tho a, India ram khawpui liana college lut turte tan pawh CUET-ah score an neih a ngai tho a ni," a ti.