Kan sorkar chuan ramri buaipuitu tur Boundary committee kan din ang - Duhoma

ZPM leader Lalduhoma chuan, an party chuan Mizoram chin humhalh an duh tih sawiin, sorkarna an chang a nih chuan ramri buaipuitu tur boundary committee an din tur thu leh an political goal chu Zo hnahthlakte rorelna pakhat hnuaia an awm a nih thu a sawi.

Lalduhoma hian Ningani zan khan Bungṭhuam community hall leh nimin zing khan Zawlpui community hall-a vantlang inkhawmah thu sawiin, "ZPM chuan ramri kan vei a, kan ram chin humhalh kan duh. Pathian leh mipui zarah sorkarna kan chang ve hlauh a nih chuan ramri buaipuitu tur boundary committee kan din ang a, NGO-te nen ṭang tlangin consensus-in ngaihdan pakhat kan nei ang," a ti.

ZPM Leader chuan, "Tunah chuan ramri bula intihbuaina chauh kan ngaihtuah a, status qou chiah kan thleng pha a, a aia thui kan kal a ngai. Ṭhenawmte'n an bawhchhe zel a, hma an rawn sawn zel a. Buaina a awmin kan inbe leh a, chuti reng reng chuan ram kan hloh hret hret zel a ni," a ti a; ramri buai chinfel tumna tak tak a awm loh thu a sawi.

Thangrama Zo hnahthlakte an theihnghilh dawn lo tih sawiin Lalduhoma chuan, "An ngaihtuahna leh an duhte kan hria a, duhthlanna fel tak an siam theihna tur kan ngaihtuahpui dawn. Kan political goal chu Zo hnahthlakte rorelna pakhat hnuaia kan awm hi a ni a, a ni reng bawk ang," a ti.

Lalduhoma chuan, sorkar siam tura mipuiin an beisei ber chu ZPM an ni tih sawiin, "Lawm luh sên loh mi thar hmun tinah an awm a, mipui kohna kan chháng sêng lo. Min thawhsaktu a awm a ni," a ti a; India ram pumah Congress party an tlakchhiat thu leh MNF chu vai smuggler ho phènah an hotu pa ber a awm niin mipuiin an ngaih thu a sawi.

Tute emaw páwl nih vanga dàwn ringawt tumna rilru paih bo a ngaih thu sawiin Duhoma chuan, "Taima apiang dinchhuahna sorkar, thawk rim apiangin Mizoram budget an her chhuah hnemna sorkar siam ang u. Tunah chuan kan thawk rim thlâwn a, kâwng a na thlâwn a, thlan a far thlâwn a, kut a durh thlâwn a, thawk rim apiang beidawnna ramah kan inchhuah tawh a ni," a ti a; thawk rim apiangte dinchhuahna turin mipui tel lo chuan tih theih a nih loh avangin ZPM-a tel vek turin a sáwm a ni.

Lalduhoma leh amah ṭawiawmtute hian Zawlpui khuaa Mizo IR police-te an tlawh nghal a ni.