DC leh Traffic SP-ah chhuah phalna Chhuah phalna la turin chhuah a ngai
Inkharkhip thawh sarihna (Lockdown 7.0) nimina kalpui ṭan a nih hnuah Aizawl Municipal Corporation (AMC), district headquarters leh DC-te'n containment area-a an puanahte lirthei hmanga veivâk duh tan sorkar
aṭangin phalna lâk a ngai a; Aizawlah chuan DC leh Traffic SP-ah phalna lâk tur a ni a, district dang zawngah chuan DC-ah lâk tur a ni.
Inkhârkhip hmasa lam zawngah chuan chhuah phalna hi local task force-te'n an pe chhuak ve ṭhin a; thawh sarihnaah erawh chhuah phalna pe chhuak thei zingah local task force an tel loh avangin, an pe ve thei tawh lo a, sorkar official aṭang chauhin lâk theih a ni tawh.
Nimina Aizawl khawpuia police duty-te chuan Vanglaini palai zawhna chhángin, "Vawiin aṭangin inkaihhruaina thar kenkawh tum ni mah se, a ni khatna a nih avangin task force phalnaa veivâk an tam lutuk. Chuvangin, lirthei khalhtute chu thil awm dan kan hrilhfiah a, naktuk aṭang chuan strict taka kenkawh kan tum," an ti.
Hetih lai hian, nimin khan DC leh Traffic SP pisa aṭanga chhuah phalna lâk tum hi an tam hle a, anni hnen aṭanga phalna la turin veng hla tak tak aṭangin DC leh Traffic SP pana chhuah tho a ngai. Inkaihhruainaah hian, DC leh Traffic SP-a chhuah phalna dil tura kal theihna tura phalna lâkna tur tarlan a ni lo.
Lockdown 7.0 chhunga lirthei tlân phal lohin a huam lohte chu - Covid-19 duty sorkar hnathawkte motor, ambulance leh medical/veterinary emergency-a hman motor, damdawi-ina thawk te, print & electronic media-a thawk te, kohhran motor, bawlhhlawh paih motor, bawnghnute phurh/semna motor, bank-a thawk te, telecom service duty motor, local task force duty-te motor, khaw kar kawnga bus, maxicab service leh phai aṭanga bungraw phur luttu motor-te a ni.