MBOCWWB-in Rs.22,58,01,960 an nei mek ; 2015-2016-17 chhungin zirlai tanpuina la pe lo

Mizoram Building & Others Construc­tion Workers Welfare Board (MBOCWWB) chuan, an hnuaia kut hnathawka eizawng inziak lut mi 16,672 hnenah ṭanpuina chi hrang pakua hmangin Rs. 5,61,01,020 a sem tawh. MBOCWWB hian Rs. 22,58,01,960 hman tur a la nei a; chutih laiin, kum 2015-16 leh 2016-17 chhungin inziak lut fate zirna atana ṭanpuina pek ṭhin chu tihtawp a ni.

MBOCWWB-a inziak lutte leh an fate tan ṭanpui chi kua - Children Education Assistance, Death Benefit, HSSLC Cash Award, Medical Assistance, Maternity Benefit, Disable Benefit, Disability pension, Funeral Assistance leh Marriage Assistance-te a awm.

Vanglaini-in RTI Act hmanga zawhna MBOCWWB SPIO-in a chhan danin, ṭanpuina hi kum 2012-13 ah sem ṭan a ni a, hemi kum hian mi 2,409 hnenah Rs. 59,55,300 pek a ni. Zirlai ṭanpuina bik pawh scheme pakhat aia tam a awm a; kum nga chhungin scheme hrang hrangah zirlai 16,177 hnenah Rs. 5,17,06,800 sem a ni tawh.

Zirlai ṭanpuina pek tam ber, children education assistance hi MBOCWWB dan Section 3(VII)(a)-in a ziah dan chuan, inziak lut fate chu pawl 1-10 an nih thlengin zirlai pakhat tan Rs. 2,000 pek theih a ni a, chhungkaw pakhatah zirlai pahnih pek theih a ni.

Kum 2013-14 chhungin children educational assistance-ah mi 13,294 tan Rs. 4,40,70,000 pek a ni a, death benefit-ah mi 27 tan Rs. 6,95,000, medical assistance-ah mi 80 tan Rs. 3,06,800, disable benefit-ah mi pakhat tan Rs. 30,000 pek a ni.

Kum 2013-14 chhung hian mi 13,402 hnenah ṭanpuina chi hrang hrang Rs. 45,101,800 an pe chhuak a, kum nga chhunga an pek tam ber kum a ni.

Kum 2014-15 chhungin ṭanpuina chi hrang paruk hmangin mi 657 hnenah Rs. 34,75,200 pek a ni. Children education assistance hnuaiah mi 474 hnenah Rs. 16,81,500 sem a ni a; death benefit-ah mi 49 hnenah Rs. 1,250,000, HSSLC cash award-ah mi pahnih hnenah Rs. 20,000 pek a ni. HSSLC cash award hi MBOCWWB member fa, HSSLC Examination-a an district bika mark hmu sang ber hnenah Rs. 10,000 pek theih a ni.

Kum 2014-15 chhung vekin medical assistance-ah mi 121 hnenah Rs. 4,73,700 pek a ni a; maternity benefit-ah mi 10 hnenah Rs. 20,000, disable benefit-ah mi pakhat hnenah Rs. 30,000 pek a ni bawk.

Kum 2015-16 chhungin ṭanpuina chi ruk sem a ni a; an sem chhuah tam ber chu medical assistance-ah mi 102 hnenah Rs. 4,01,100 pek a ni. Death benefit atan mi 28 hnenah Rs. 8,50,000, mi pathum hnenah Rs, 2,00,000, a vaiin Rs. 6,00,000 sem a ni. Death benefit hi chi hnih a awm a, hna thawhnaa chesuala thi hnenah an pe ṭhin.

Kum 2015-16 chhung vek hian HSSLC cash award mi pakhat hnenah Rs. 10,000 pek a ni a, medical assistance-ah mi 102 hnenah Rs. 4,01,100 pek a ni. Maternity benefit-ah mi 10 hnenah Rs. 20,000 hman a ni a; disable benefit hmangin mi pathum hnenah Rs. 35,000 pek a ni bawk. Hetih lai hian, children education benefit pek a ni lo.

Sorkar kum kal mek 2016-17 chhungin children education assistance pek chhuah a la ni lo a; death benefit-ah mi 13 tan Rs. 1,85,000 pek chhuah a ni tawh.

Dân hluiah natural benefit-ah Rs. 10,000 dawn theih chu Rs. 15,000 dawng tura siam danglam a ni a, accidental death benefit-a Rs 2,00,000 dawn theih ṭhin pawh dan thar chuan Rs. 50,000 chiah dawn theiha siam a ni.