Serlui tuikhuaha sangha khawina hmun MJA member-ten an tlawh

Mizoram Journalists' Association (MJA) gen. headquaters leh Kolasib MJA member-te chuan, Serlui tuikhuaha sangha an khawi lenna hmun cage culture chu February 17 khan Fisheries department Secretary Thlamuana hoin DFDO C Laldawngliana leh UDC C Vanlalchhuangi nen an tlawh.

He sangha khawina hmun hi power siam­chhuahna aṭanga km. chanve velah tuikhuah chhungah siam a ni a, helaiah hian block pathum siam a ni a, a block chhak ber chu New Builum khaw sangha khawitute enkawl a ni a, a dawtah N.Chawnpui leh Bilkhawthlir ten an enkawl block a awm.

He sangha khawina hi kum 2013 khan hman ṭan a ni a, block pathumah hian cage 85 awmin cage khat hi chhungkaw khat enkawl zel an ni a, sangha chi leh a chaw zawng zawng hi fisheries department-in an tumsak. A tharchhuah chu a khawitu leh department-in a inzatin an inchan sem ve thung a ni.

Sangha hi phuhlip nei lo (pangasius) a ni a, bawm khatah hian sangha note 3000 zel dahin thla 8-10 ah an puitling a, kg.1-5 vela liante an ni thei.

Tunah hian cage 29 ah sangha 87000 khawi mek a ni. Cage zawng zawnga sangha note an dah loh chhan chu a chi duh ang zat hmuh a nih loh vanga nih thu DFDO C Laldawngliana chuan a sawi.

Cage culture hi RKVY programme hnuaiah kum 2012-2013 khan bul ṭan a ni a, cage pakhat hi feet 16 bial niin a thuk zawng pawh feet 16 a ni.

Cage-te hi thir structure hmanga siam a ni a, tuia a lân theih nan barrel an dah thluah a, cage tin chu len hmanga hung vek a ni a, tuikhuah zau taka chhuak thei si loin sangha vulh len an ni ṭhin.