Gas bûk tling lo thawn lêt

Legal Metrology thupek angin, tun hnai khan gas bûk tling lo bûr 1,145 chu gas distributor-te'n Borkhola Bottling Plan-ah an thawn let.

Legal Metrology hnathawkte'n tun hnai khan gas distributor hrang hranga sem tur an endik a, bûr 3,060 an bûk zinga bûr 1,145 chu bûk tling lo tih an hmu chhuak a, gas phurtute leh gas bûk tling lote hi an man nghal.

Legal Metrology hotute sawi danin, gas-te hi bottling plant aṭanga agency hnen panpuina kawngah driver-te'n an khawih chingpen a ni.

Legal Metrology Joint Controller chuan thupek chhuahin, gas distributor-te chu IOC marketing guidlines zâwm a, gas bûk tling lote chu a phurhna motor ngai vêkin bottling plant-ah thawh let vek tur leh, kawng lakah a phurtu driver-te khawih chingpen a nih angin distributor chu dan an neihte anga hma la turin hriattir a ni.

Distributor-te chu gas bur buk tling ngei an dawn theihna atan ruahmanna siam turin Legal Metrology-te chuan an hriattir a, mipuite pawh gas an lak dawnin bukna chang hre turin an chah.