PHE Minister-in Khawzawl leh Saitual WSS a tlawh

PHE minister Zodintluanga chuan, Inrinni khan Greater Khawzawl Water Supply Scheme pipeline siam hna thawh mek leh Greater Saitual Water Supply Scheme pump house leh tui lakna hmun Tuivawl luia siam mekte a tlawh.

Zodintluanga sawi danin, Saitual WSS hi la hawng rih lo mah se, kawlphetha hmanga tui pump chhuah a ni tawh a; Khawzawl tui lakna tur hi kumin chhunga zo hman turin hna chak taka thawh a ni.

Khawzawl WSS pipeline-in a paltlang tur khua, Khawzawl aṭanga km. 7 vela hláa Arro khua pawh PHE Minister chuan a tlawh nghal a; Arro khuain tui lak tur chu an chhawr ve nghal theihna turin ruahmanna a siampui.

Zodintluanga chuan, tun ṭhál chhung ngeia pipe phûm leh a zawm hnate thawh zawh a nih theih nan harsatna awmte sutkian a nih dawn thu a sawi a, "Kuminah Khawzawl WSS hna hi zawh hman ngei tum a ni," a ti.

Saitual WSS a tlawhnaah PHE Minister chuan, department lamte'n harsatna an tawh mekte a enfiah a; hna thawh zawh thawkhat a ni tawh tih sawiin, "Kar khat chhung vel chu diesel chauh ni lo electric power hmanga tui pump chhuah a ni tawh. Siam rem ngai tlem azawng a la awm tih chauh loh chu tui hi sem a ni tawh," a ti a, hawn thuai theih tura peih thawkhat a ni tawh tih a sawi.

Saitual WSS atana hian NLCPR aṭangin Rs. 21,53,20,000 hmuh a ni a, Excelsior Merchants Private (Ltd), Kolkata-te'n a siam hna an thawk. Tuivawl luiah tui lakna hmun, raw water pump house siam a ni a, Tuivawl kamah treatment plant, clear water pump leh 33Kv transformer bun niin, tui pump chhoh thlenna hmun, main reservoir chu Saitual khawdai, Saihmar tlang chhipah siam a ni.