Congress ṭhalai-in in sak an sawifiah

Congress party ṭhalaite chuan thuchhuah siamin, MNF ṭhalaite'n February 15, 2017-a Lalrinmawia Ralte, minister aṭanga bânna thehlut ta in sak anga an enfiah leh TV news-a tihchhuah tura an peka thlalak langah thil dik tawk lo a awm niin an tarlang.

MPYCC chuan, Hangi Lunglen Tlanga Lalrinmawia in sak anga MNYF-te'n thlalak an tihlan zinga pahnih chu Lal­rinmawia Ralte in sak ni loin, Tourism department sak ve ve a nih thu an sawi a, "Tlang chhîp taka mi kha View Point Building a ni a, kum 1990-a sak a ni. Building pakhat zawk kha Viewing Tower with Restaurant, Durtlang tih a ni a, kum 2003-a sak niin Tourism department-in an sawi," an ti. Building pahite hi rawng lâr tak hnawih thar a nih avangin a langsar hle niin an sawi.

Lalrinmawia Ralte sak ni thei tura MNF ṭhalaite'n an tarlan building sak mek lang pawh kha furniture workshop tura sak nia sawiin MPYCC chuan, "A ram pawh lei ni loin, Zuangtui Industrial Estate chhunga Plot-I, Block-II a ni a, plot hi furniture workshop dinna atan kum 2010-ah dil a ni a, October 17, 2011-ah lease deed sign a ni. Allotment fee leh annual fee pawh ni 18.1.2013-ah pek a ni," an ti.

Congress ṭhalaite chuan, politics-a mimal inbeihnaa sorkar biulding, mimal sak anga lang thei tura mipui hmuha pholan a ni chu pawi an tih hu leh MNF-te chuan dâwta inpuh chîng tawh lo se an duh thu a sawi bawk.