MPC-in mobile campaign an buatsaih

MPC party chuan Inrinni khan Aizawl West-III leh Aizawl South-II huam chhunga veng hrang hrangah, 'Zoram tluchhe mek tundin lehna' tih thupuiah hmangin mobile campaign an nei a; an party hruaitute'n thu an sawi.

MPC chuan thu­chhuah siamin, Congress leh MNF party-te'n sor­karna an chelh chhungin lalna leh thuneihna ringawt buaipui a, ram hmasawnna hna thawhna kawngah ke an pên tak tak loh avangin Mizoram chu retheihna leh pa­chhiatna khurah a pil mek niin an tarlang a, "Mipui mangang au thâwm a ring sâwt hle. Party pahnih, kan ram ṭhatna ei zotute lak aṭanga mipuite chhanchhuak tur leh hmasawnna lam­tluang zawhpui turin MPC chuan theihtawp a chhuah mek zel a ni," an ti.

MPC party chuan, ram veitu, mi ṭha leh chhuan­awm tak tak, ram leh mipuite'n rinna leh beiseina an nghah ngam, hming hliauna leh sûlhnu pawr la nei lote nen thawhhona thuthlung siamin Mizoram tluchhe mek tungding leh turin ṭan an la mek tih an sawi a, "Kum 2018 inthlanpui kan hma­chhawn turah mipui beisei, nghahfâk sorkar thar siam ngei tumin kan bei tlang dawn," tiin, mipui ṭawiawmna an ngen a ni.