Zu dawr bulah Hunthar Veng an pungkhawm

Save Hunthar bultumin Hunthar Veng mipuite chuan, Inrinni khan an venga zu zawrh­na dawr pathuma bungrua­te thiar chhuahsak an tum a, zu dawr neitute nen an inbiakrem avangin buaina a chhuak zui lo.

Save Hunthar chairman V Lalrinmawia sawi danin, khawtlang mipui thutlukna angin zu dawr pathum chu February 15 ral hmaa an zu zawrh titawp tur leh dawr khar tura ngenna pek an ni a, hun tiam chhunga hma lak a nih loh avangin February 16, 2017 khan zu dawrte chu an kalhsak a ni.

Zu dawr kalh a nih hnuah dawr neitute aṭangin dàwr tihtawp emaw, chhuahsan tumna emaw an hriat loh avangin Hunthar Veng khaw­tlang mipuite chuan zu dawr pathumte chu Inrinni khan bungruate thiar chhuahsak an tum a; Save Hunthar hruaitute leh zu dawr neitute chu inbiain, inremna an siam a ni.

An inrem dan chuan, Hunthar Venga zu dawrte chu hawn zui loh tur a ni a, dawr neitute'n hmun danga dawr an hmuh hma chuan an bungruate dawr­ah an la dah thei ang. Bungraw kawl sa chu tihralna an hriat chuan Save Hunthar hriatpui­nain an la chhuak thei dawn a ni.