KHAWTHLIR

Kristian Hospital Ni
Nimin, Pathianni khan Mizoram Baptist Kohhran chuan Kristian Hospital Ni an hmang a, thupui chu 'Tihdam rawngbawl - Ringtute mawhphurhna' tih a ni. Kristian Hospital Ni pual hian thawhlawm lak khawm a ni a, Christian Hospital, Serkawn Poor Fund atan hman a ni dawn. Christian Hospital hi February 10, 1923-ah din a ni a, kum tinin a din ṭan ni emaw, din champha hnaih ber Pathianniah Kristian Hospital Sunday hman ṭhin a ni.

Soldiers Renewal Sunday hmang
Salvation Army (India Eastern Territory) chuan, nimin khan corps hrang hrangah ‘Soldiers Renewal Sunday’ an hmang a; Territorial headquarters leh Central South Division chhunga officer-te chu corps leh society hrang hrangah Soldiership Campaign neiin an kal. Soldiers Renewal Sunday thupui chu ‘Puitlinna’ tih a ni.

Training khar
State Institute of Rural Development and Panchayati Raj leh National Institute of Rural Development and Panchayati Raj, Guwahati ṭangkawpin autonomous district council-te hmasawnna atana plan an siam thiamna tur atana training an buatsaih chu, nimin khan SIRD&PR hmun, Leitanah khar a ni a, bialtu councillor R Zomuanpuiin a hman pui.

Lusun khawhar
Bonny Lalrindika h/o Lalrunmawii, Ramhlun Vengthar chu February 19 zing dar 9:30 khan CMC, Vellore-ah cancer avangin a thi. A ruang hi vawiin chawhnu dar 2:20 hian Lengpui Airport a lo thlen beisei a ni. Bonny Lalrindika hi Mizoram Synod office-ah Assistant co-ordinator a ni a, Presbyterian kohhran upa niin Pathian thuhriltu sawm hlawh tak a ni a; sports journalist ni bawkin hun rei tak The Aizawl Post chanchinbuah infiamna chanchinthar a ziak ṭhin.