Swab sample lâk tawh a bo - MPCC

Mizoram Pradesh Congress Committee (MPCC) chuan thuchhuah siamin, Khawzawla quarantine centre awm zinga nula pakhat, Delhi aṭanga haw chu a swab sample lak tawh hmuh zawh a nih loh avangin a result a chhuak ve thei lo a, a ṭhiante zawng zawng an chhuah hnuah quarantine centre dangah nimin khan sawn a nih thu an tarlang.

MPCC tarlan danin, swab sample lâk tawh, a hnua hmuh zawh loh nula leh a ṭhiante chu June 1, 2020 zing karah Khawzawl an thleng a, Khawzawl Vengthar Presbyterian Kohhran Hall-ah awmtir (quarantine) an ni. Chu centre-ah chuan hmeichhia 21 leh mipa 15 an awm.

Quarantine centre-a an luh aṭanga ni hnihna velah an swab sample lak a ni a, an zingah Covid-19 vei pakhat a awm avangin June 16-ah sample lak nawn leh vek a ni. June 16-a sample lak result chu June 22, Thawhlehni-ah a chhuak a, mi dang zawngin an result an hriat laiin, nula pakhat chuan a result a hre ve ta lo a ni. 

Nula sample chungchang chu Champhaia Health department-a mawhphurtute zawhfiah an ni a, ZMC lamin a sample an hmuh zawh loh thuin an lo chhang. Chuvang chuan, nimin chawhnu dar 2 vel khan a swab sample an la nawn leh nghal.

Congress party chuan, swab sample lâk tawh sa tihbo leh tihchingpen a awm fo nia sawiin, an ngaih thutak thu an tarlang a, "A rang thei ang bera chhuifiah a, siamṭhat ngai lai siamṭha nghal turin Mizoram sorkar kan phût a ni," an ti.

Mizoram sorkarin June 8, 2020-a inkaih­hruaina a siamah, inkhung hran hun chhung ni 14 chu ni 21-ah a pawh sei thu sawiin MPCC chuan, "Sample a lak dan leh ZMC-a test kalpui danah thil fel lo a tam avangin a huna result hre hman lo an tam hle a, quarantine centre-a ni 30 chuang awm an tam hle," an ti a; quarantine chhung­in khung hran zawng zawngte swab sample lâka endik hman vek tura tih a nih thu an sawi.

MPCC chuan, state páwn aṭanga haw tur zat te, an haw hun turte sorkar­in a hre lâwk vek chungin anmahni endikna tur khâwl Mizoram sorkarin a ngaihthah hle tih sawiin, "Anmahni hruaitu bus enkawltute khung hran loh vang te, test kalpui dan fel lo lutuk vangtein quarantine centre-a awmte leh mipuite'n harsatna kan tawh phah nasa hle," an ti.

Congress party chuan, "Total lockdown vanga eizawnna lama harsatna nasa tak tâwk mek mipui­te ṭanpuina lamah sorkar laipui aṭanga ruahmanna awm sa bak Mizoram sorkarin hmalakna pakhat mah a nei lo," an ti a; inbuatsaihna ṭhat loh vang­in dinhmun hlauhawm takah mipui an awm phah a, mipui harsatna siam záwngin total lockdown a kalpui leh ringawt ṭhin tih an sawi.

MPCC chuan, ZMC-a sample test result chu a tûk zingah IPR department-in an puan chauh avangin, positive pawh awm se, police lamin contact tracing an ti nghal mai thei lo tih an sawi a, "Chumi avanga ZMC hnathawk te, IPR leh police inkara inhmuh thiam lohna thleng ṭhinte hi a fel lo hle. Positive an awm chuan a zan là lâa rang taka contact tracing tih a nih theih nana kalphung siamṭhat a ngai hle a ni," an ti.