Mizoramah petrol a la vang zel; Tuialhthei man tihhniam hman a ni

Assam-ah tui lian leh leiminin rel kawng a tihchhiat avangin Mizoramah petrol a la vang chhunzawm zel . Hetihlai hian sorkar laipuiin tuialhtheia chhiah (excise duty) a tihhniam avangin Indian Oil Corporation (IOC) pawhin tuialhthei man a tihniam nghal a, Mizoramah pawh nimin aṭang khan petrol leh diesel man tihhniam a ni.

All Mizoram Petroleum Dealers Association (AMPEDA) president K Lalnghakliana chuan Vanglaini zawhna chhángin, IOC-in tuialhthei man a tihhniam avangin nimin aṭang khan Mizoram pumah petrol leh diesel man an tihniam ve nghal tih a sawi.

AMPEDA President sawi danin, Aizawl bikah petrol litre khatah Rs 8.46 leh diesel Rs 6.36-a tihhniam a ni a; nimin aṭang khan Aizawlah petrol pangngai man litre khatah Rs 95.72 niin, extra premium man Rs 100.34 a ni a, diesel man Rs 82.18 a ni.

K Lalnghakliana chuan, Mizoramah oil company pathum - IOC bakah, Hindustan Oil leh Bharat Petroleum-te an awm thu sawiin, tuialhthei an hralhna rate chu company hotute siam anga an kalpui thu leh rate chu inang lo hret hret a awm theih thu a sawi.

Union Finance minister Nirmala Sithara­man chuan May 21, Inrinni zan khan ram pumah tuialhtheia chhiah lâk tihhniam a nih thu a puang a; Pradhan Mantri Ujjwala Yojana scheme hnuaia eirawngbawlna gas-a hamṭhatna dawng thei mi nuai 900 velte tan gas bûr khat (bûr 12 thleng) manah subsidy Rs 200 pek a nih tur thu a puang bawk.

K Lalnghakliana chuan, filling station hrang hrangte'n Guwahati aṭanga tuialhthei la turin nimin Pathianni thleng khan tanker eng emaw zat an tír thla tawh tih a sawi a, "Tanker pariat chuan Guwahati aṭangin an rawn phur chhuak mek a ni," a ti.

AMPEDA President chuan, Mizoramah tuialhthei dah khâwlna lian (oil depot) a awm loh avangin ramri buaina leh kawng chhia vangin harsatna an tâwk fo tih a sawi a, "He harsatna awm ṭhin sutkian nan oil depot kan mamawh tak zet a ni," a ti a; Mizoramin oil depot a neih theihna turin company dawr emaw, a hmunhma tur ram zawn chungchangah AMPEDA an inhuam thu a sawi bawk.

Assam state chhungah tuilian leh leiminin rél kawng a tihchhiat nasat avangin hmarchhak state ṭhenkhatin tuialhthei an nei tlem hlawm a; Mizoramah pawh filling station hrang hrangte chuan sorkar aṭanga permit nei leh coupon neite chauh an pe thei a, mipui náwlpuia hralh thei (free sale) an awm zauh ṭhin bawk.

Mipuiin rualkhai zawka tuialhthei an insem theih nan Mizoram sorkara Food, Civil Supplies & Consumer Affairs (FCSCA) Director chuan lirthei pakhata hralh theih zat May 16, 2022 khan a bituk tawh a; filling station-te'n tuialhthei an neiha an free sale pawhin sorkar bithliah angin an hralh chhuak ṭhin.

Tuialhthei neih zat (dead stock tel loin) petrol-ah litre 5,000 leh diesel-ah litre 10,000 aia a tlem chuan FCSCA hriatpuina leh phalna tel lo chuan hralh chhuah tawh loh tur a ni.