Biological Diversity Day hman a ni

Nimin May 22 kha International Day of Biological Diversity a ni a, he ni pual hian May 20, Zirtawpni leh May 21, Inrinni khan Mizoram hmun ṭhenkhatah hun hman a ni. Day thupui chu 'Building a shared future for all life' tih a ni.

Biological Diversity Day hi kuminah Pathianniah a tlak avangin Mizoram Pollution Control Board (MPCB) hnuaia Mizoram ENVIS Hub leh National Green Corps (NGC)-te chuan May 20 khan hun hmangin, Aizawla sikul ṭhenkhata Eco Club member-te Aizawl Sahuan (Aizawl Zoological Park) an tlawhpui a, mi 50 vel an kal.

Eco club member-te chuan Aizawl Sahuana ramsa awmte an zir chian bakah, thing leh mau awmte an zir a; biodiversity vênhim kawnga theihtawpa hmalak dan tur an inzirtir bawk.

Kumina Biological Diversity Day pual hian Mizoram ENVIS Hub leh NGC chuan primary school aṭanga higher secondary school thlenga Eco Club member-te tan Online Quiz Competition an buatsaih mek a, May 25, 2022-ah result an puang dawn a ni.

International Day for Biodiversity hi Biodiversity Day tia sawi a ni bawk a; United Nations Organisation hmalaknain kum 2000 aṭangin khawvel pumah May 22-ah hman ṭhin niin, thupui thlan bik kum tin a awm ṭhin. Kumina Biodiversity Day hi Champhai leh Khawzawlah pawh hman a ni a, Champhaiah chuan thing phun hnatlang neih a ni.

International Day for Biodiversity pual hian Champhaiah chuan May 21, Inrinni khan thingphun hnatlang neih a ni a, Champhai Nature Conservancy leh Environment, Forest & Climate Change department ṭangkawpte’n TT Road dungah Tlaizawng ṭiak eng emaw zat an phun.

Khawzawlah chuan Khawzawl Wildlife Division leh YMA Sub-Headquarters, Khawzawl bultumin Khawzawl Electric Veng YMA Hall-ah May 21 khan hman a ni a, district bawrhsap CC Lalchhuangkima’n a hmanpui.

CC Lalchhuangkima chuan, mihring, nungchate leh khualrel thil siam dangte inbûk tâwk taka chênhona siam turin mihringte’n mawhphurhna sang tak an neih thu sawiin, “Sava kah nasat avangin kan thlai tharte’n an tuar mek a ni,” a ti a; YMA member-te leh mi tu pawhin khawvel boruak hrisel leh chênna tlak siam turin tih theih an neih thu a sawi.

Khawzawla hun hmannaah hian YMA hruaitute leh Biodiversity Management Commit­tee member-te pualin ramngaw leh nungcha humhalh pawimawhzia inzirtirna, ‘Sensitization of YMA leaders/BMC members on Environment and Wildlife Conservation’ hman nghal a ni.