Buhfai kan dah khâwl zingah kan thar a awm lo - FCSCA Minister

Food, Civil Supplies & Consumer Affairs (FCSCA) minister K Lalrinliana chuan May 21, Inrinni khan NABARD Warehousing Scheme (NWS) 2013-2014 kaltlanga sak Khawbung Supply kudam leh staff quarters a hawng a; Mizoramin buhfai a dah khawl zingah Mizorama thar a awm loh thu a sawi.

K Lalrinliana chuan, Khawbung Supply kudam chu buhfai quintal 3,000 dah theihna turin a ṭul anga zauh leh tur a nih thu a sawi a, "Mizoramin buhfai kan lei kan dah khawl zingah kan thar chhuah pakhat mah hmuh tur a awm lo hi ṭan kan lâk a ṭul tih lantirtu a ni. Intodelh turin rilru kan siam a ṭul tak zet," a ti.

Kudam a ṭhat loh chuan buhfai chhia a tam ṭhin tih sawiin Minister chuan, "A dawngtu turte'n an dawn kim loh bakah, sorkarin sum tam tak a séng thlâwn ṭhin a, chuvangin Mizoram sorkar chuan kudam ṭha leh him neih a ngai pawimawh," a ti a, kudam atan sorkarin kawng hrang hrang a dap thu a sawi.

Supply Minister chuan, Mizoram páwn aṭanga buhfai lak luh leh sem darhin kaihhnawih a ngah thu sawiin, "Tun thlenga harsatna lian tâwk loa kan la kal thei hi Pathian zahngaihna vang a ni," a ti.

Bialtu MLA Ramthanmawia pawhin thu sawiin, a bial chhungah a hmasa atan Khawbung leh Khuangleng kudam sak a nih thu a sawi a; tun hma chuan kudam chu a chung leh bang rangva a nih avangin hnáwng leh ruah lakah buhfai a him loh hlauthawng rêng rênga an awm ṭhin thu a sawi bawk.

Khawbung Supply kudam hi a dung ft. 35.6 leh a vâng ft. 27-a zau, buhfai quintal 2,000 dah theihna a ni a, a sak nan cheng nuai 151 hman a ni. Hnáwng leh huhin buhfai a tihchhiat loh nan a chhuata lung phah chhuah vek chungah RCC slab inchi 6-a chhah chhûn a ni a, a bangah leirawhchan ft. 1-a chhahin rem a nih bakah, ṭha taka plaster a ni.