Minister Rinsanga'n Sihphirah PACS a hawng

Cooperation minister C Lalrinsanga chuan May 21, Inrinni khan Sihphir Venghlun Multipurpose Cooperative Society Ltd hnuaia din Primary Agriculture Cooperative Society (PACS) pisa thar a hawng a; PACS-in thlai thartute tan hmasawnna nasa tak a thawk dawn tih a sawi.

C Lalrinsanga chuan, PACS chu inlungrualna leh thawhhona ṭhaah chiah a hlawhtling thei tih sawiin, "Rinawmna tel lo chuan nau a hrin belh zel theih loh. PACS hi ṭangkai taka hmangin kut hnathawktuteah hlawhtlinna hmuh tur a awm chho tawh a, mahni sum vawm khawm loan-a pûka awmze neia bul ṭan theih a ni tih kan hmu tawh," a ti.

Cooperative movement chu hman thiam chuan mi tin ban phak innghahna tlakah siam theih a ni tih sawiin, "Kan ngaihtuahna thlak tum ṭan ila, Agriculture nena inzawm tlat kan thar chhuahte awmze nei zawka dah khawlna tur hmun ṭha PACS a ding ta hi ka lawmpui tak meuh a ni," a ti a; Sihphir Neihbawiah Agriculture department-in lei tihṭhatna OP 12 fertilizer an kalpui mek thu a sawi.

Agriculture Minister chuan, SEDP hnuaia bekang leh vaimim chìntir chungchang sawiin, "Awmze neiin ruahmanna kan kalpui mek a, a dahṭhatna te, a hernate buaipui zel a ni dawn," a ti.

Mizoram Cooperative Apex Bank chairman T Lalmuanpuii pawhin thu sawiin, Mizoramah PACS 29 din a nih tawh thu leh member 13,108 an awm tawh thu te, PACS awm mekah cheng vbc. 20 vel deposit a awm mek thute a sawi.

Sihphir Venghlun Multipurpose Cooperative Society-ah hian member inziak lut account hawng tawh mi 128 an awm a ni.