Party sorkar tihbo kan tum a, Mipui sorkar kan din dawn - Lalduhoma

ZPM leader Lalduhoma chuan, kalphung ṭha hnuaiah chuan mi an ṭha mai ṭhin tih sawiin, ZPM chuan party sorkar tihbo a, mipui sorkar an din dawn thu a sawi.

Lalduhoma hian kar kal ta chhunga Hachhek bial a fannaah May 20, Zirtawpni tlai leh zan khan Zawlnuam Bawrai leh Zawlnuam Vengpuiah thu a sawi a, Inrinni zing khan Dárlâk khuaa vantlang inkhawmah thu a sawi bawk a, "Kalphung kan thlak dawn a, system ṭha hnuaiah chuan mi an ṭha mai ṭhin. Party sorkar hi tihbo kan tum a, mipui sorkar kan din dawn a ni," a ti.

ZPM Leader chuan, "Delhi motor pawh zât lo mipuite hi changkang thei lo tura kan inngaih tlat theih nan tuna kan ram hruaitute hian min bum mek a ni. Anni pawh sorkar se engmah an ni bik chuang lo ang, tia ZPM sawitute hian mipui tihbeidawn an tum a ni," a ti a; Pathian leh mipui zarah sorkarna an siam chuan kalphung thara an kal dawn thu a sawi.

ZPM sorkar huna kal dan tur an duang fel tawh nia sawiin Duhoma chuan, "Kan árkhawthimdai ngawt dawn lo. Mi thiamte nen ṭanghoin kal dan tur engkim ruahman vek a ni tawh. Research based road map kan nei a, kal dan tur hre sain kan kal dawn," a ti a; political system dik loin inthliarna a thlen a, chumi tireh tur chuan revolution a ngai ṭhin tih sawiin, chutiang a thlèn ngai loa kum 2023-ah sorkar ṭha din turin mipui a sáwm.

Lalduhoma chuan, an kal dan tur an ruahman fel tawh nia sawiin, "Chutah chuan hmasawnna hnathawh viltu tur monitoring committee ruangám te, chief minister-in works department chang lo a, minister rual a vil dan tur ruangám te, MPSC tihchak dan tur te, sorkar kal dan tur thil dang tam tak hmuh theihin a awm dawn. Kan ngaih pawimawh em em kut hnathawktute chungchang, thlai thar hralh dan turte pawh a awm vek dawn," a ti.

ZPM Leader chuan, MNF leh Congress unaute'n an tih tur leh an tih theih an ti zo tawh nia sawiin, MNF ni lo, Congress ni lo, kuttuma eizawng leh ṭhalaite tana hmasawnna hmél thar vote chhuak turin mipui a sáwm a ni.