Tuihâwkin chawhmeh zuarte a tibuai

May 21, Inrinni zing khan ruah a sûr nasat avangin Aizawl Bazarpuiah tuihâwk a luang nasa a, chawhmeh zuarte thlai zawrh lai a len darh nual a, an buai phah hle. He thil thleng chungchangah hian Congress party ṭhalaite chuan thuchhuah siamin, chawhmeh zuarte an lainat thu an tarlang.

MPYCC chuan, “Bazarpuia bazar building sakna tur Congress sorkarin pawisa a dah diam tawh, MNF sorkarin a hun takah sa zo ni se chuan hetiang hian mangang takin bazar nu ho bakah, kut hnathawktute an awm lo tur a ni. Hetiang dinhmuna mipui siamtu MNF sorkar hi demawm kan ti tak zet,” an ti.

Congress ṭhalaite chuan, “Tlang rama chêngte’n tui lian kan tawng ve ta mai hi MNF sorkar leh Aizawl khawpui enkawltu Aizawl Municipal Corporation, MNF kaihhruai sorkar kan hrawn mekte hi tûk khat ruahsur mai maia bazar leh a chhehvel enkawl kawnga an demawmzia a lang chiang hle a ni,” an ti a; ṭawngkam thiamna hmanga insawifiah tum lo a, zah nacháng hriaa insiamṭhatna atana hmang turin an chah.

New Market building pui ber sak ṭhat hna a kal mek a, Aizawl City Centre Annexe tih a ni. In satu chu Lushai Engineers an ni a, sum ruahman cheng nuai 3,641.59 chu K Deposit-ah dah mek a ni. October 4, 2018-ah kutthlak ṭan niin, thla 36 (kum thum) chhunga sak zawh tura tih a ni a; chutih laiin, hna thawh tur zinga 35% chiah thawh a la ni.

MPYCC chuan, Bazarpui sakna tur sum, K Deposit-a dah chu MNF sorkarin sum enkawl a thiam loh avangin a harsa nia sawiin, “Hnain a tawrh phah ta niin a lang,” an ti a; chutih laiin, MNF sorkar chu a duhnaah chuan sorkar kalphung pêl pawhin sum tam tak hmang ṭhin a nih thu an sawi bawk.