Dan loa lak luh leiṭha man

May 19, Ningani zan leh May 20, Zirtawpni zan khan Khawzawl police leh Vairengte police-te leh Phainuam NGO volunteer-te chuan dan loa state páwn aṭanga lak luh leiṭha (urea) eng emaw zat an man.

Khawzawl police-te chuan May 20 zan khan an checkgate-ah truck ke 12 nei pakhat aṭangin urea ip 500 an man a, truck driver chu thu zawhfiah turin an kawl mek. Truck hi T Liana, Vapar khaw ta a ni a, driver chu Thangsiankhai (26), Champhai Bethel Veng a ni.

Thangsiankhai-a'n a sawi danin, urea chu Vairengte aṭangin a phur chho a, Mualkawi a dah tur a ni. Khawzawl police-te chuan hemi chung­changah hian Essential Commodities Act Section 7 hnuaiah thubuai an ziak lut a, Champhai Court-ah thawn a ni ang.

Vairengte police-te leh Phainuama tlawmngai pawlte chuan May 19 zan khan dan lo leh phalna tel loa Silchar aṭanga lak luh urea ip 210 an man bawk.

Leiṭha hi LMV truck pathum, Lal Uddin (35) Badarpur, Karimganj, Assam, Jahir Uddin (41) Bagha, Assam leh Forij Uddin Laskar (24) Bagha, Assam-te khalh aṭangin Phainuamah an man a ni.