Hripui vei mi 129 (0.05%) chiah an awm

Mizoramah Covid-19 vei an tlahniam zel a, nimin tlai khan enkawl lai (active case) mi 129 chiah awm tawhin, chu chu hripui vei hmuh tawh aṭangin 0.05% chiah a ni.

May 20, Zirtawpni leh May 21, Inrinni khan Covid-19 vei mi 16 ve ve hmuh chhuah a ni a; hripui vei dam tawh nimin khan mi pakua leh Inrinni khan mi 28 chhuahtir niin, hripui vanga thi an awm lo.

Zirtawpnia Covid-19 positive hmuh tharte chu mipa pakua leh hmeichhia pasarih an ni a, RAT hmanga hmuh chhuah vek niin, positivity rate chu 4.94% a ni. Mi 16 zingah Aizawl khawpuia mi pahnih an tel a, a bâk zawng chu district khawpui páwn lama mite vek an ni.

May 21-a hripui vei hmuh tharte chu mipa pali leh hmeichhia 12 niin, RAT hmanga hmuh vek an ni a, positivity rate chu 11.43%-ah a kai chho leh. Mi 16 zingah Aizawla mi pakhat a tel a, a bak zawng Aizawl páwn lam mi vek an ni.

IDSP record angin, Mizoramah Covid-19 vei 2,28,126 hmuh chhuah a ni tawh a, mipa 1,06,215 leh hmeichhia 1,21,911 an ni a, mipa aiin hmeichhia 15,696-in an tam zawk. Nimin tlai dar 5 thleng khan mi 2,27,299 (99.64%) chhuahtir an ni tawh a, mi 698 (0.31%) thi tawhin, enkawl mek mi 129 (0.05%) an awm.

Nimin tlai khan Mizorama district 11 zingah Covid-19 vei mi 40 awm tlinna a awm tawh lo a; active case tamna ber Saitual district-ah mi 39 an awm. District pathum - Siaha, Champhai leh Lawngtlai district-ah hripui vei an awm rih lo thung.

Sorkar thuchhuah tarlan danin, Mizorama Covid-19 positive hmuh tawh 2,28,126 chu kum 2011 chhiarpui angin mihring 1,000 zela mi 207 positive an awm ang a ni a; mi 1,00,000 zelah Covid-19 vangin mi 63 an thi tawh ang a ni bawk.