Swab sample test result tihchhuah hma dan tur ZMC SMS portal siam thar a ni

State páwn aṭanga rawn haw, quarantine centre-a awm mekte'n an swab sample endikna result hriat zung zung theih nan ZMC SMS Portal siam a ni a, thawktute hna chanpual pawh sîksawi a ni.

Swab sample test result hriat hma a nih theih dan tur ngaihtuahin nimin khan ZMC-ah Health secretary H Lalengmawia hoin official-te an ṭhukhawm a; H Lalengmawia chuan, "Quarantine centre-a awmte leh rinhlelhte'n sample test result rang zawka an hriat zung zung theih nan theihtawp chhuah a ni," a ti.

Health Secretary chuan, sample test result nghaktute'n an dinhmun an hriat vat chu thil tihmâkmawh a nih thu a sawi a; tun hnaia mipui aṭanga result hriat har vanga vuivaina thâwmte chu a hriatthiampui thu leh result chinfel dan chu fimkhur ngai leh tih tur a tam thu a sawi bawk.

ZMC-a Microbiologist sawi danin, June 16, 2020 thlenga swab sample lak tawhte chu nimin khan endik kim vek hman tum a ni a; sample chhinchhiah (labelling) felfai tâwk lote a awm a, chu'ngte chu an district-a thuneitute hrilh nghalin, rang taka sample lâk nawn leh vek tura tih a ni. ZMC laboratory-a sample test tawh zawng zawng chu sing khat a chuang tawh.

Meeting-ah hian commu-nication gap awm palh thei a nih avangin thawktute chanpual pawh sîksawia siam rem a ni a; negative result bikah, quarantine-a awmte tan a awm hun chhung thlenga tidanglam thei leh hunbi pêla inkhung hran theihna a nih avangin SMS portal hmanga inhrilh vat tura ruahman a ni.

Vawiin (June 24) aṭang chuan ZMC SMS portal aṭangin result thawn chhuah nghal zel a ni tawh dawn a; mahni result chhuah hun tawha ngai, la hre si lote chu an hming, address, kum zat leh phone number-te covid19@zmc.edu.in ah thawn tura ngen an ni.