State Day pualin Larsapin thuchah a tichhuak ; Mizoram hi chak taka hmasawn tur Dinhmunah a ding a ni - Governor
Nimin, February 20 kha Mizoramin styate dinhmun a neih champha, 'State Day' a ni. He ni pual hian a hranpaa hun hman ni lo mah se, Governor Lt.Gen. Nirbhay Sharma chuan State Day thuchah a tichhuak a; Mizoram chu chak taka hmasawn thei tur dinhmunah a ding tih a sawi.
Governor chuan, State Day lawmpuina chibai Mizo mipuite bûkin, "Kum 30 kal ta vawiin ní angah khan Mizoram tana méllung pawimawh tak phun a ni a. August 14, 1986-ah President-in remtihna hming a ziah hnuah Mizoram chu India rama state 23-na ni turin February 20, 1987 khan Lammual, Aizawlah a lawmna hun hmangin hlânkai a lo ni ta a ni," a ti.
Mizo mipuite'n state nihna nei tur leh remna leh muanna nei thei tura man an pek a sang hle tih sawiin Larsap chuan, "Kum 20 chhung rambuai kan paltlang a, harsatna tam tak paltlang hnua state kan sual chhuah hi kan ngaihlu tur a ni," a ti a; Mizoramin kawng dik a zawh theihna tura mipui leh sorkarin thâ thlah hauh loa an beihna chhuanawm a tih thu a sawi.
Lt. Gen. Nirbhay Sharma chuan, thutlukna siam zawng zawng leh kan ke pên tinte'n Mizo mipuite beiseina leh theihna famkim lan chhuahna tur a hril tih hriat a pawimawh tih sawiin, "Kan hma lam hun kan thlir chuan, phat rual lohin Mizoram hi chak taka hmasawn thei tur dinhmunah a ding a, a panna kawng thui leh biboh tak hi kan zawh chhuah phawt chuan hlawhtlinna pár zu thlum takin min hmuak a ni," a ti.
Mizoram state-in kum 30 chhungin thil inthlakthleng tam tak leh harsatnate pawh a paltlang tih sawiin Larsap chuan, "Heng zawng zawng hian state ṭhan zelna kawngah nghawng inang lo tak tak a nei a, Mizo khawtlang nun danglam tak, ṭhenrualte nena insuihzawm tlat kan nihnate hi a hlu a ni," a ti a; inpumkhatna ṭha takte chu hmang ṭangkai turin Mizo mipuite a sáwm.
June 30, 1986-a India sorkar leh MNF-te'n inremna tluantling an ziah hnuah Mizoram chu state puitlinga hlángkai turin ruahmanna siam a ni a; August 7, 1986-ah state puitlinga Mizoram hlankaina tur bill chu Lok Sabha-ah pharh niin an pass a, member 310 zinga 308-in an thláwp a ni.
Rajya Sabha-ah pawh member 171 zinga 160-in thlâwpin an pass leh a; August 14, 1986-ah India President-in hming a ziah hnan hnuah 53rd. Constitution (Amendment) hnuaiah Mizoram chu India rama state 23-na a ni.
February 20, 1987 Zirtawpni-ah India prime minister Rajiv Gandhi chu Mizoramah lo kalin, zing dar 9:30-ah Lammuala mipui tam tak kalkhawm hmaah Mizoram state nihna chu a puang. Rajiv Gandhi chuan, Mizoramin remna leh muanna a neih vang leh state a neih tak vanga a lawmpui thu a sawi.
February 20-ah hian Raj Niwas-ah Mizoram Lieutenant Governor ni lai chu Gauhati High Court Chief Justice-in Mizoram Governor atan rinawmna thu tiamtirin a la lut a; chief minister atan Laldenga a lak luh bakah, minister atan Zoramthanga, Rualchhina leh Tawnluia te lak luh an ni.