PRISM hruaitute man chhan sawifiah

Additional public prosecutor H Lalmuan­kima chuan thuchhuah siamin, PRISM-in Health department laka ACB hnena complaint an thehluha thubuai chungchanga PRISM hruaitute man an nih chhan a sawifiah.

H Lalmuankima chuan, Health department laka PRISM-in ACB kaltlanga complaint an thehluh chu ACB-in an register tih sawiin, "He case hi Court-in thu tlingah ngaiin, thubuai a ngaihtuah turin a chhawp chhuak a. PRISM-te hi complaint thehluttu an nih avangin thuhretu pawimawh berte zinga mi an ni a, an thu hriatte hi Court hmaah an sawi ngei ngei danin a phût tlat a ni," a ti.

PRISM hruaitute chu Court-a in lan turin vawi 10 koh an nih thu sawiin Additional PP chuan, "An inlan loh zel avangin prosecution-te ngen ang leh Criminal Procedure Code-in a sawi angin, warrant of arrest issue a ni a, man an nih hnuah bailable warrant a nih angin bail-a chhuah leh nghal an ni," an ti a; chumi hnua Court-a an lan leh hun tura ruatah pawh an lan duh chuan loh thu a tarlang.

H Lalmuankuma tarlan danin, PRISM hruaitute lakah hian Gauhati High Court judgement-in Criminal Revision Petition No. 12/2003, Union of India vrs Mohammed Abdul Hassam-in a sawi ang leh, Cr.PC-in a phût angin warrant of arrest (non-bailable) issue theih a la ni a, chu chu Court thuneihna liau liau a nih avangin Court hian a thuneihna a hmang lo ang tih sawi theih a ni lo.