Congress party-in inthlana tlin tumin Hma an la tawh lo - Zoramthanga

MNF president Zoramthanga chuan, inthlana tlin tumin Congress party-in hma a la tawh lo nia sawiin, "A tam thei ang ber mimal inhaivûr tumin ṭan an la ṭheuh ringawt mai a ni," a ti.

Zoramthanga hian nimin khan Lengteng Constituency MNF Joint Block Conference a hmanpuinaah thu sawiin, "Inthlana tlin leh tum chu ni se kohhran leh khawtlang duh loh zu zawrh tihtawp lam hawia hmalak a hun. Chutiang lam an hawi lo a, mipui duh loh zawngin an kal lui ngat ngat a ni," a ti a; sum awm loh vangin hmasawnna a tawp a, Congress party mite ngei pawh an beidawng tawh niin a sawi.

MNF President chuan, chief minister Lal Thanhawla chuan thu sawiah reng reng tute emaw vauna ringawt a chhâkchhuak reng nia sawiin, "Mipui, kohhran, sorkar hnathawk leh zirlaite duh loh zawng hlirin Congress sorkarin hma an la lui ngat ngat a ni," a ti.

Congress party chu a dintu vai ho pawhin an duh tawh loh a, a ni têlin an tlachhe zel nia sawiin, "Thil dang sawi miah loin, kawng chhia ringawt pawh hi tlak chhan tling a ni. LEIT department-a sum hman dik lohna nasa lutukte hi heti mai hian a tawp dawn lo," a ti a; lottery-a cheng vbc. tél eirukna te, Dihmunzawl in ṭhiah dan mak te, Mizo Carbon truck, Meghalaya aṭanga Aizawl ni khata vawi thum lungalhthei phur theite hi mipui hian a awmzia dik tak an hria niin a sawi.

MNF thuchhuah chuan, nimina Lengteng Constituency MNF Joint Block Conference-ah hian an party zawm thar voter 638 an lawm lut niin a tarlang.