Hindi zirtirtute tan sorkarin tan a la reng - School Education department
School Education department chuan thuchhuah siamin, CSS hnuaia Hindi zirtirtute'n Central sorkar aṭanga sum hmuh loh vanga hun rei tak hlawh an la thei lo chu pawi an tih thu an tarlang a, "Hlawh an lak thuai theih nan leh kum 10 dang an thawh chhunzawm theih nan state sorkarin Central-ah theihtawp a chhuah reng a ni," an ti.
School Education department thuchhuah tarlan danin, CSS Hindi teacher-te hi Centrally Sponsored Scheme of Financial Assistance for Appointment of Language Teachers hnuaia rawih niin, February 18, 2011-ah mi 1,305 rawih ṭan an ni a; Hindi teacher-te chu high school-ah 389 leh middle school-ah 916 dah an ni.
Hindi teacher-te hlawh hi sorkar laipui tum vek niin, a tirah chuan H/S-a thawkte tan thla khatah Rs. 9,750 leh M/S-a thawkte tan Rs. 7,500 a ni a, Mizoram sorkar nawrpuina vangin October 1, 2011 aṭangin H/S-a thawkte tan Rs. 20,000 leh M/S-a thawkte tan Rs. 15,000-ah tihsan a ni. Mizoram sorkar nawrna vang bawkin March 1, 2015-ah H/S leh M/S-a thawkte hlawh chu Rs. 29,000-ah tihsan a ni leh bawk.
Hindi zirtirtute Central-in a rawih hun hi February 28, 2017-ah a tawp dawn tih sawiin, thuchhuah chuan, zirlaite leh thawktute dinhmun ngaihtuahin, kum 10 dang an thawh leh theih nan Mizoram sorkarin sorkar laipuiah theihtawp chhuahin a nawr reng tih an sawi a, "Chief Minister-in Prime Minister hnenah DO letter vawi hnih thawnin, kum 10 dang pawtsei tur leh hlawh tur a dilsak tawh a, School Education Minister pawhin Union HRD Minister Prakash Javadekar chu a office-ah a hmu tawh bawk," a ti.
CSS Hindi teacher-te an thawh chhunzawm theih nan leh hlawh an lak theih nan department-a officer-te'n Central-ah an nawr reng bawk tih sawiin, School Education department chuan, "School Education Minister leh Parliamentary Secretary-te'n January 25, 2017 khan HRD Minister leh Secretary-te chu an pisaah an hmu ve ve a, a kaihhnawih official dangte pawh an hmu nghal a ni," an ti a; February 14-ah Aizawla rawn zin Union minister Dr Harsh Vardhan leh Kiren Rijiju-tye an sawipui tih an tarlang.
Department thuchhuah tarlan danin, CSS Hindi zirtirtute thawh hun pawhsei chungchanga sorkar laipui thuthar chu, scheme hlâwkpui dan zirchianna (evaluation) nei tur rawn tirh phawt a ni a; evaluation ti tur hian Awadh Research Foundation, Lucknow chu ruat niin, thla thum chhunga report thehlut tura tih an ni. An report-ah Mizorama chhunzawm dan tur thui tak a innghat dawn a ni.
School Education department chuan, evaluation report chu a pawimawh dawn viau tih sawiin, "Evaluation team-te hi School Education department leh CSS Hindi teacher-te'n ṭha tak leh lungrual taka ṭawiawm leh ṭanpui an ṭul hle dawn a ni," a ti.