Bru-te hruai kîr tura ruahmannate SC-in tihhlawhtlin a remti hrih lo
Tripura refugee camp pasariha Bru-te Mizorama hruai kîr tur ruahmanna awm chu Supreme Court-in tihpuitlin rih lohna tur thupek a tichhuak.
Thu dawn danin, Mizoram Bru Displaced People Forum (MBDPF) bultumin Bru refugee camp-a awmte chu an awm anga awm zuitir hrih phûtin Supreme Court-ah an zualko a; hemi chungchang hi ngaihtuah fel a nih hma chuan Bru hruai kîr tura ruahmanna awm chu bawhzui lo turin Supreme Court chuan a ti a ni.
Supreme Court-a an thu thehluhnaah hian relief camp pasariha chhungkaw 6,688-a chhungkaw pa berin hming an ziak a, hruaikir an nih hmaa an thil phûtte tihhlawhtlin phawt an phût.
Supreme Court thuchhuak hi MBDPF ukilte chuan Delhi Mizoram House-a Resident Commissioner a hriattir a, Resident Commissioner hian Chief Secretary leh Home Secretary a rawn thawn chhawng leh a ni.
Vanglaini palai zawhna chhangin Home department-a additional secretary Lalbiakzama chuan, Supreme Court-in thupek avangin Bru-te chu hruai kir theih an ni hrih loh thu a sawi a, "Supreme Court thutlukna kan ngaichang tawp rih. Hemi chhung hian thil ṭul hrang hrangte kan lo buaipui mai turah kan ngai," a ti.