Hmunphiah qtl. 500 vel lei tawh

Mizoram Agriculture Horticulture Forestry & Marketing Cooperative Society (MAHFED) Ltd. chuan February 18, 2017 thleng khan hmun paliah hmunphiah quintal 500 vel an lei tawh.

MAHFED managing director Zohmingthanga sawi danin, hmunphiah hralh tur neite'n Mizoram hmun hrang hrang aṭangin an thar chhuahte hralh theih turin an buatsaih mek a, tun kar chhung hian a leina hmunah phurh thlen a ni ang a, hmunphiah lei rûnpui ṭan theih beisei a ni.

Hmuhphiah leina hmun pakhat, Zemabawkah chuan Aizawl district bakah, Serchhip, Lawngtlai leh Siaha district-a mite'n an hmunphiah thar chhuahte kg. khat Rs. 70 zelin an hralh. Hmunphiah hralh turte chu a ro, ṭha taka tihfaia tèl khawm tur a ni.

A leina hmun dang, Vaitin, Saipum leh Vairengteahte pawh an lei ṭan tawh a; Vaitinah chuan kg. khat Rs. 65 niin, quintal 5,000 vel lei theih beisei a ni a; Saipumah chuan kg. khat zel Rs. 80 niin, quintal 5,000 vel lei theih beisei a ni bawk. Vairengteah erawh chuan an la lei khawl tam lo thung.

Hmuhphiahte hi MAHFED-in a thawhpui Northeast Empowerment Forum (NEEF)-in an la chhawng a, a lei nan hian Tribal Affairs Ministry aṭangin Rs. 1,74,00,000 an dawng. Sum hmuh zinga cheng nuai 64 vel an hmang zo tawh a, a bak an mamawh belh chu rang taka lak chhuah a ṭul avangin sum pe chhuak thuai turin Mizoram sorkar an ngen a ni.