Hmasawn zel turin Congress party A sorkar zel a ngai - Zodintluanga

Congress Legislature Party (CLP)-a treasurer Zodintluanga, minister chuan, Mizoram hmasawn zelna turin Congress party an sorkar zel a ngai niin a sawi.

Nimina Hachhek Constituency Joint Block Congress Committee-in Zamuang khaw community hall-a an party thar lawm luhna inkhawma n buatsaihah thu sawiin, Zodintluanga chuan, "Mizoramah mi harsa leh kut hnathawktute'n lei rem an rah nan leh hmasawnna ruhrel ṭha neia hmasawn zel turin Cong­ress a sorkar zel a ngai a ni," a ti.

Zodintluanga chuan, Congress party a sorkar zel loh chuan Tuirial Hydel Project leh State Referral Hospital-te pawh MNF hunah tihchhiat vek a nih thu sawiin, "Dik lo taka zangnadawmna lâk tum vanga pass dik lo neitute'n Tuirial HEP hmuna thawktu NEEPCO laka khawvela total bandh rei ber an neih khan a hun laia sorkarna chelhtu MNF an tel avangin police pakhat pawh hnawt kiang turin tirh an ni lo a, an hna a tawp phah," a ti a; Congress a sorkar leh hnuah bul an ṭan leh a, tunah chuan peih a ni ṭêp tawh niin a sawi.

State Referral Hospital-ah pawh Congress sorkar hmasa hmalak tawh chu MNF sorkarin contract pek ringawt an buaipui avangin DoNER-in an titawp niin a sawi a, "Kan sorkar hnuah bul kan ṭan leh a, vawiinah chuan medical college thlenga din turin ruahmanna kan siam a ni," a ti.

Hachhek bialtu MLA Lalrinmawia Ralte-in minister aṭanga bânna a thehluh chungchang sawiin Zodintluanga chuan, "Kan ramah politics a inmun mek a, bialtu MLA mi thiam tihhmaibalh tumin ama tih pawh ni lo, official lama thil kalsualah puh a ni a, thu dik lo nen nasa takin an nawr a ni," a ti a; dik lo taka an puhnaah thu dik a lan theih nan bànna a thehlut nia sawiin, ropui a tih thu a sawi bawk.

MLA Lalrinmawia Ralte pawh­in thu sawiin, amah duhsaka thlangtute chungah lawmthu a sawi a, "Bânna ka thehluhna thu chu ziakin in lo chhiar tawh ka ring," a ti a; NIAS chungchangah, "Thil chhui har niin a lang lo a, rei lo tea chhui chhuah theih mai, kan department chan a nih angin mawhpurtu ka ni a. Mizoram Krisriante hian rin thilthu ringawt kan ûm luai luai tur niin ka hre lo a, an duh ang takin chhui ni rawh se ka ti a ni," a ti.

Inkhawmah hian Congress party zawm thar voter 251 an lawm lut niin an tarlang.