Siaha-ah Covid-19 finfiahna dah theih leh theih loh enfiah

Nimin khan Siaha bialtu MLA Dr K Beichhua, minister of state hoin Expert Team-te'n Siaha District Hospital-ah Co­vid-19 finfiahna tur Truelab Quatro (Mini-Realtime PCR) dah theih a nih leh nih loh leh, dahna tura hmun ruahman an enfiah.

Dr K Beichhua chuan, laboratory-a Covid-19 test chungchanga social media-a thu dik hrûla mipui rilru hruai kâwi tuma thu thehdarh a awm nia sawiin, "Virus aiin a hlauhawm zawk. Keini chauh kan buai bik lo. WHO pawhin a dona leh enkawlna protocol pawh a thlak danglam reng a, an mualphopui nasa. He natna hi thil thar a ni a, study period-ah kan awm a, zir chawp chungin kan do mek a ni," a ti.

Siaha Bialtu MLA chuan, an district chhung­a Covid-19 vei mekte dinhmun a chhe lutuk lo nia sawiin, "Pathian zarah an dam thuai ka beisei. He natna avanga Mizoramah mitthi kan la nei lo hi Pathian min hruaina lawmawm tak a ni," a ti a; inpuhmawh záwnga kal loin, Zoram mipuite ṭan rual a ngaih thu a sawi.

Expert Team leader Dr H Lalhlenmawia, HoD, Pharmacy department, RIPANS chuan, Covid-19 vei leh vei lo enfiah danah mipuiin hriatthiam chiah loh an neih a rin thu sawiin, "Ruahmanna lo siam tawh leh kal dan inmil chiah lote pawh thil awm thei a nih rualin, Covid-19 swab sample test hi chu sample lâk aṭanga darkar hnih/thum hnuah result lo lam rawh tih theih chi a la ni ve lo. A haw haw zawnga result nawr chhuah tum hi thil kalphung pangngai a ni lo," a ti. 

Team member Dr Vanramliana, Pa­chhunga University College chuan, Siaha District Hospital-a khawl thar dah tur chu an laboratory-in a zo ang em tih enfiah tur an nih thu sawiin, "ZMC swab sample test-na hi Mizoramah a awmchhun ni mah se, laboratory pathum nei Manipur-te'n ni khatah sample 1,000 an endik theih laiin, Mizoramah chuan thawktute thawhrimna avangin ni khatah sample 600/700 kan test thei a ni," a ti a; sample chu minus 80 degree celcius-a dah chuan a chhiat theih loh thu a sawi.

Truelab Quantro, Mini-Realtime PCR hi Tuberculosis (TB) enna khawl siam danglam (upgrade) a ni a, Indian Council of Medical Research (ICMR) chuan Covid-19 swab sample test nan kumin April 4, 2020 khan a pawm. He khawl hmang hian ni khatah sample 40 vel endik theih beisei a ni.