Lìrnghîng avanga harsatna tâwkte chhawmdawl vat turin sorkar phût

BJP, Mizoram Pradesh president Vanlalhmuaka chuan, June 22, Thawhṭanni zinga lìrnghîng vanga in leh lo, biak-in leh bungraw chhiate chhawmdawl a nih theih nan hma la vat turin Mizoram sorkar an phût tih a sawi.

Vanlalhmuaka hian nimin khan an pisaah thuthar thehdarhtute a kâwm a; June 21-a lirnghingah chhiatna a thlen loh laiin, June 22-a lirnghing vangin Champhai Rural Development Block leh Khawngbung RD Block huam chhungah mihring chenna in, biak-in leh in dang ṭhenkhat leh bungrua a chhiat nual thu a sawi a, "Vanneihthlak takin nunna chán leh hliam Pathian zar­ah an awm lo a, a lawmawm hle," a ti.

Lirnghing vanga chhiatna thlengte thlalak an hmuh ang ang Mizoram BJP-in BJP hmunpuiah leh Prime Ministers' Office-ah an thurawn angin an thehluh thu sawiin Vanlalhmuaka chuan, "Chhiatna nasa tak thleng lo mah se, Prime Minister chuan a hriat veleh CM Pu Zoramthanga a rawn be nghal a, lirnghing vanga chhiatna leh harsatna thlengah a ṭul apiang leh a ṭul anga zela puih kan nih tur thu a rawn hrilh a ni," a ti a; PM-in Mizoram leh Mizote a ngaihsak avangin thlamuanthlak a tih thu a sawi.

Mizoram BJP President chuan, Zoramthanga kaihhruai MNF sorkar chu issue base-a NDA an nih leh nih loah buai lo a, a rang lama lirnghing vanga in leh lo, biak-in leh bungrua chánte chhawmdawl an nih theih nan hma la vat tura an phût thu a sawi a; lir­nghing vanga harsatna tâwkte chu PM-in chhawmdawl leh ṭanpui turin Mizoram CM kaltlanga a intiam avang­in lungngai lo turin a chah a ni.