In sak ṭanpuina tur scheme hawng
In sak ṭanpuina Rs. 1,50,000 semna tur scheme, Pradhan Mantri Awas Yojana (PMAY) - Housing for All chu nimin khan Lal Thanhawla Auditorium-ah UDPA minister Zodintluanga'n a hawng.
Zodintluanga chuan, PMAY-Urban chu khawpuia in leh lo nei lote ṭanpuia, in neihtirna tur scheme kum 2022 thleng awh tur a nih thu sawiin, "Ministry of Housing & Urban Poverty Alleviation hnuaia mission programme a ni a, Mizoram chuan June 2015-a Prime Minister-in scheme a hawn aṭangin hma a la
ṭan ve nghal a, DPR thehlut hmasa leh sum hmu hmasa ber pawl kan ni," a ti.
UDPA Minister sawi danin, PMAY hi mi harsa, kum khata Rs. 3,00,000 la lut tling lote tana ruahman a ni a, in sak ṭanpuina dawng turin in sakna hmun tur ram neih a ngai a, in hmun hi ṭanpuina dawngtu hmingin a awm tur a ni.
Mizorama khaw 23-ah kalpui tur niin, chhungkaw 20,000 chuang hnenah in sak ṭanpuina sem tum a ni a, tunah hian district khawpui pariat tan in 10,286 sakna tur DPR approval neih tawh a ni.
Lawngtlai leh Aizawl district-ah chuan hna ṭan nghal turin peih a ni tawh tih sawiin Zodintluanga chuan, "District khawpui ni lo khawpui dang (census town) 15 tan DPR buatsaih mek a ni a, in sak ṭanpuina dawng tur endik mek a ni. In sak hi uluk taka vil dan tur ruahman a ni a, in sak laiin vawi nga report siam a ngaih dawn avangin ṭanpuina dawngtu turte hnenah ṭanpuina sum chu thil danga hman atan pawhpên chi a ni lo," a ti.
PMAY (Urban) hnuaiah hian in sak ṭanpuina Rs. 1,50,000 pek tur a ni a, in sak chu Rs. 2,00,000 hû tur a nih avangin a neituin Rs. Rs. 50,000 a tum ve a ngai dawn. Tun dinhmunah Aizawl district-ah in 864 leh Lawngtlai district-ah in 500 sakna tur chu sem theih tura peih a ni tawh.
Ṭanpuina pek theihna khuate chu - Aizawl, Lunglei, Siaha, Champhai, Kolasib, Serchhip, Lawngtlai, Mamit, Saitual, Sairang, Darlawn, Lengpui, Vairengte, North Vanlaiphai, Thenzawl, Hnahthial, Tlabung, Bairabi, Biate, Khawhai, Khawzawl, Kawnpui, Zawlnuam te a ni.