Museum Week hman mek a ni

Mizoram State Museum chuan nimin khan Museum Week an hmang ṭan a, State Museum chu a duh apiang tan a thlawna tlawh theihin an hawng. Museum Week hi February 24, 2017 thleng hman a ni ang.

Nimina Museum Week hawnna hunah hian tel turin MHIP branch pali leh MUP unit pali bakah, zirna in pathum - DIET, IASE leh RIPANS zirlaite sâwm an ni a; tel tura an sawmte hi an tel ṭha hle a ni.

Museum Week chhung hian State Museum chu ni tin chawhma dar 10 aṭanga tlai dar 4 thleng a duh apiang tan en man awm loa hawn a ni dawn a; Museum enkawltute chuan State Museum chu tlawh turin mi tin an sâwm. Museum Week hi kum 2004 aṭangin kum tin February thla chawlhkar hnuhnung berah hman ṭhin a ni.

Art & Culture department hnuaia awm, Mizoram State Museum hi sorkar kum 2015-16 chhung khan mi 6,260-in an tlawh a, museum en man aṭangin sorkarah Rs. 50,280 an chhûng lut.

Sorkar kum kal mek April 2016 aṭanga nimin thleng khan mi 3,305-in an tlawh tawh a, Museum-a luh man aṭangin sorkarah Rs. 42,835 an chhûng lut tawh. Kum kal meka museum tlawhtu zinga 23 chu ram dang mi (foreigner) an ni a, mi 48 chu Mizoram páwn lam mi an ni.

State Museum-ah hian gallery paruk a awm a, thil (object) 3,757 lak khawm tawh niin, chung zinga 933 chu show case chi hrang 107-ah dah lan a ni a, a bak zawng chu reserve collection-ah dah a ni. Show case-ah dahte hi hunbi inchhâwkin an thlak kual ṭhin.

Mizoram State Museum hian Tribal Museum, Ranchi; Bhopal Museum leh Silpigram Museum, Guwahati-ahte object eng emaw zat an thawn (donate) tawh bawk.

Mizoram State Museum hotute chuan, State Museum chu ni bika a thlâwna en theiha an hawn loh chuan tlawhtu an tam lo tih sawiin, a thlawna en theiha hawn a nih erawh chuan tlawhtu an ṭhahnem ṭhin tih an sawi a, "Pathianni leh sorkar chawlh tih lohah chuan Inrinni telin ni tin hawn a ni," tiin, Museum chu tlawh uar turin mipui an sáwm.

State Museum-a luh man hi puitling pakhat tan Rs. 20 leh naupang pakhat tan Rs. 10 a ni. Sikul naupang, zirtirtute hruaia educational trip-a kalte chu 50% concession pek ṭhin an nih bakah, kum 65 chin chung lamte chu en man chawitir an ni ngai lo. Ram páwn lam mi tan luh man Rs. 50 lak a ni bawk.