MPC-in ramri humhalh loah sorkar puh

MPC party senior vice president Vanlalhlana chuan, Mizoram ramri humhalhna kawng­ah Mizoram sorkar an che tâwk lo nia sawiin, pawi an tih thu a sawi a, "Hetih lai hian kan ṭhenawm Assam state-te erawh chu ramri humhalh­na kawngah an huangtau hle thung," a ti.

Nimina MPC party inkhawmah thu sawiin Vanlalhlana chuan, January 23, 2017-ah Assam aṭangin Boundary Commission leh sorkar official-te Mizoramah lo lutin, Thinghlun aṭanga metre 50 vel, Mizoram chin chu Assam ram chanah an rîn lut niin a sawi a; chutianga an tihah chuan Mizoram sorkar emaw, thuneitute emaw an ráwn lo a, an hriattir lo niin a sawi.

Assam sorkarin Mizoram sorkar thuneitute râwn lo leh sawipui hmasa loa an duh dan dana Mizoram hneh­chhuh tuma hma an la chu hriatthiam harsa an tih thu sawiin Vanlalhlana chuan, "He thil hi a rang lama ngaihven tur leh a ṭul anga kan ram humhim nana che nghal turin kan sorkar kan phût a. Kan beisei anga Mizoram sorkar hi ramri humhalhna kawngah a che lo a nih chuan MPC party-te kan ram chhana humhalh turin kan pên chhuak dawn a ni," a ti.