KMS-in NIAS an zirchianna an tarlang

Kolkata Mizo Students (KMS) chuan nimin khan thuchhuah siamin, Nalanda Institute of Advance Studies (NIAS), Kolkata chungchanga an thil hmuh chhuahte an tarlang.

KMS chuan, NIAS-a Mizo zirlaite chu an member-te an nih thu tarlangin, "Bul an lo ṭan tawh angin an zirlaite zir zo se kan duhpui ber a. An course-te an zawh ngei theih nan NIAS hi zir zawmna tlak a ni ang em tih te, Annamalai University dinhmun te, NIAS chungchang leh thu lêng velte a dik em tihte hre chiang turin theihtawpin hma kan la a ni," an ti.

KMS tarlan danin, NIAS-a buaina chungchangah NIAS-a Mizo zirlaite'n KMS-ah an harsatnate an thlen mai loh avangin KMS-in hma an lakpui mai lo a; February 12, 2017-ah NIAS-a Mizo zirlaite aṭangin ṭanpui dilna lehkha a hmu. Thil awmzia hre turin February 15 aṭangin NIAS chu a hmunah kal chilhin an zir chiang a ni.

NIAS hi West Bengal sorkara Societies Act XXVI, 1961 hnuaia inziak lut a ni a, Soorya Institute of Hotel Management kaltlangin Annamalai University a zawm. Institution campus, class room leh hostel atan mi dang building an luah hawh vek a ni a; teaching staff pasarih an nei mek. Anamalai University-a kum tin affiliation an ti thar ṭhin a, kum 2016-17 atan affiliation an renew tawh.

NIAS hian hostel hranpa an nei lo a, hosteller tam dan azirin mi in (flat/room) an luah kual ṭhin. KMS-in an zir chian lai hian hostel pathum an nei a; tuna an hman mek hostel awmna chu NBCC Vibgyor Tower, New Town, Rajarhat a ni. A hmain Salt Lake Sector-V ah boys hostel leh Sector-III ah girls hostel a awm a; eng emaw buaina vangin tuna an hman mekah kum 2015 tirah an insawn.

KMS hruaitute hian NIAS chairman Mainak Saha chu Mizoram sorkarin sum a pek turte hun rei lote chhunga a pek tlak nghal chhan an zawt. NIAS Chairman-in a chhan dan chuan, NIAS lamin instalment pahniha course fee leh fee dangte Mizoram sorkarin a pe tla vek a nih chuan hostel fee Rs. 5,000 thla tina pek tur chu Rs. 1,000-in a tláwm theih tur thu leh, chutiang a nih chuan, kum thum chhunga discount tel loa pek tur zat Rs. 1,39,71,200 chu Rs. 1,28,19,200-ah a tlahniam thei dawn a, course pumpui atan sorkar­in Rs. 11,52,000 chuang a hlep thei dawn tih an hriattir a ni.

KMS chuan, NIAS-a Mizo zirlai ṭhenkhat zingah buaina siam vang leh class kal ṭhat loh vanga final warning hmu an awm thu an tarlang a, "A pawi kan ti tak zet a, mimal intihmualphona a thlen theih avangin tute nge an nih tarlan erawh a rem lo," an ti.

An tarlan danin, zirlai 32 zinga 28-in first year exam an hma­chhawn a, exam hmachhawntu 28 zinga 12 chuan chhan hrang hrang avangin first year leh IT training zawhah college an chhuahsan.

Tun dinhmunah zirlai pasarihin May 2017-ah second year an exam theih dawn bakah, zirlai pakhatin second year (IT paper) a exam thei dawn a; zirlai pariatin May 2017-ah vek third year an exam thei dawn bawk.

KMS-in NIAS aṬanga document an lak Ṭhenkhatte
1. Certificate of Registration of Societies
2. Recognition certificate of Organisation’s Quality Management System. ISO 9001:2008
3. Certificate of affiliation with Annamalai University (for the Academic year 2014-2015)
4. Certificate of affiliation with Annamalai University (for the Academic year 2016-2017)
5. Memorandum of Understanding (made between Government of Mizoram & NIAS)
6. Industrial Training details and records of all Mizo students under MYC.
7. Notification letter pakhat (zirlai kal ṭha lo leh ti ṭha lo vaukhanna)
8. Mizo zirlaite'n ngaidam dilna lehkha an ziah 10
9. January 20, 2017-a Mizoram sorkar aiawh leh NIAS hotute meeting minute
10. Inspecting official-te thil hmuh dan report leh NIAS nena inremna an ziah copy (March 30, 2016-ah)
11. NIAS building leh hostel thlalak (February 17, 2017-a lak)
12. Mizo zirlaite attendance sheet