Sorkar laipui hnuaia hmalakna thlirho

Serchhip District Development Coordination and Monitoring Committee (DDCMC) chu, nimin khan DC conference hall-ah chair­man CL Ruala, Lok Sabha MP leh co-chairman Ronald Sapa Tlau, Rajya Sabha MP te kaihhruaina hnuaiah an ṭhu a; sorkar laipui scheme hrang hrang hnuaia hnathawhte an thlirho.

CL Ruala chuan, meeting-ah hian state budget hriat chian a la nih loh deuh avangin hmalak dan siam fel a har deuh dawn tih sawiin, "April-a meeting hunah engkim chiang zawkin kan siam theih zawk a rinawm," a ti a; officer-te chu hnathawh ṭha, mipuite tan ṭangkai ngei tur duan chhuah tum turin a fuih.

Ronald Sapa Tlau pawhin, officer-te chu an district tihhmasawn turin an ni bâk an awm chuang lo tih hria a, hna an thawh chhunga hriat reng tlak thil ṭha tih tum ngei turin a chah.

Meeting-a tarlan danin, National Rural Drinking Water Programme hnuaiah Khawlailung leh Khawbél tuilak hna thawh a ni a, Khawbel hi zawh tawh niin, Khawlailung pawh chak taka thawh mek a ni. Project dang pawh thehluh leh niin, pawmpuina nghah mek a ni.

Swachh Bharat Missions (Gramin/Rural) hnuaiah Individual Household Latrine (IHHL) zawng zawngte sanitise latrine vek tura tih a nih avangin ruahmanna siamṭhat hlek a ni. District chhunga IHHL mamawh chhungkaw 1,346 tan tunah sum dil mek a ni a, tihfel a nih veleh Open Defecation Free District-a puan mai theih a ni dawn.

National Social Assistance Prog­ramme hnuaiah district chhungah Old Age Pension dawng mi 1,571 an awm mek a, Widow Pension la mi 164 leh disabled pension dawng mi 47 an awm mek bawk.

MGNREGS hnuaiah ni 23 inhlawhna siam a ni tawh a, kum thar aṭangin MGNREGS hi V/C kaltlang tawh loin, a thawktute bank account-ah thun vek tawh tur a ni.

IAY aṭangin December 2016 thleng khan mi 41 hnenah ṭanpuina pek a ni a, kum thar aṭang chuan he scheme hi PMAY (Housing for All) kalpui a nih tawh dawn avangin tihtawp tur a ni.