Covid-19 vei enkawl danah lungawi lo

Mara Students Organisation (MSO) Joint Headquarters, Delhi chuan, Siaha district mi Covid-19 vei hmuh chhuah tawh mi pakua enkawl danah leh quarantine centre-a awmna tur ruahman dan­ah thil dik lo tam tak a awm niin an tarlang a, "Thuneihtute hrilh an ni chungin hmalakna a awm lo nia kan hriat avang leh community spread thleng thei a nih avangin thu­chhuah siam a ngai ta a ni," an ti.

MSO, Delhi chuan, mipui punkhawm khap a nih laiin quarantine centre-ah mi tam tak hnawh khawm an ni leh si chu hriatthiam har an tih thu sawiin, "Positive an awmin, an awmna centre-a awm zawng zawngte sample lâk a ni dawn emaw kan tih laiin, an bul hnaia awm mi ṭhenkhatte chauh sample lak niin isolate an ni," an ti.

Result positive/negative azira inmate-te an innghat ringawt chu thil hlauhawm tak nia an hriat thu sawiin MSO chuan, "Covid-19 symptom lang si lote hian mi dang­ah an tidarh thei reng a ni," an ti a; chutiang avang chuan Lorraine English School-ah pawh negative tawh a positive leh tih an tarlang.

MSO tarlan danin, Lorrain English School-a khung hrante zinga Covid-19 vei hmuh chhuah chu a thiante pahnih nen an mu tláng a, hripui vei chu a láiah mu ṭhin. Covid-19 a vei tih hmuh a nih hnuah a ṭhiante pahnih chu Don Bosco School-ah sawn an ni a, mi dangte erawh chu sawn an ni lo. Covid-19 vei nena mu ho ṭhinte pahnih chu swab sample laksak leh an ni a, pakhat zawk chuan hripui a kai tawh tih hmuh chhuah leh a ni.

MSO chuan, Covid-19 posi­tive-te awmna Lorrain English School hall 2nd floor leh ITI-a awm mek zawng zawng bakah, chu sikula awm ve, quarantine hun hmang zoa chhuak tawh zawng zawng pawh a rang lama swab sample laka endik nawn leh vek an phût tih an tarlang.

June 8, 2020-ah Siaha district mi Covid-19 vei hmuh ṭan a ni tih sawiin MSO chuan, "Admit a nih aṭanga tun thlengin doctor leh nurse-te'n vawi khat chiah an la tlawh a, a hnua positive dangte phei chu an la tlawh lo. Patient hmasa ber (hmeichhia) phei chu amahin ni eng emaw zat a awm a, zan khat phei chu current a awm lo a, mangang takin duty-te a phone a, mahse, tu ma'n an chhang lo," an ti.

Delhi MSO chuan, Siahaa medical team-te lakah Co­vid-19 veite chuan ran pawh an tluk lo nia an hriat thu sawiin, "Covid-­19 patient, symptom nei lo, ZMC-a admit-te chu eng emaw chen Vitamin C leh damdawi dang, an taksa tichak turin pek an ni a, ni tin vawi thum an vil reng. Siahaa kan damlote hi engmah pek an nih ve loh chhan kan hre duh hle a ni," an ti.