MSHCS hnuaiah bill pek loh Rs 68,63,52,238 a la awm

Mizoram State Health Care Scheme (MSHCS) hnuaiah damlo inenkawlna senso (health care bill) April 2021 thleng pek a ni tawh a, bill pek loh Rs 68,63,52,238 a la awm.

RTI Act, 2005 hmanga zawhna Directorate of Health Services SPIO-in a chhàn danin, MSHCS hnuaia damlo inenkawlna senso bill chu April 2021 thleng pek a nih tawh a, April 2021 hnu lama bill lutte pek a la awm lo.

Zawhna chhànnaa tarlan danin, April 30, 2022 thleng khan bill la pek loh 25,765 a awm a, chu'ng mite bill thehluh Rs 68,63,52,238 chu sorkarin a la pe lo a ni.

Health care bill la pek loh mi 25,765 zinga 22,956 chu damlo pangngai senso bill a ni a, chu chu Rs 64,42,43,706 a ni. Bill dang 2,809 chu Covid-19 damlo bill, Rs 4,21,08,532 a ni thung.

MSHCS-in Mizoram sorkar aṭanga kum 2022-23 atana sum a hmuh tur zat leh hmuh tawh zat zawhna chu, 'Mizoram sorkar aṭangin kum 2022-23 atan pawisa hmuh a la ni lo. Pawisa hmuh tur zat hriat a ni lo,' tiin SPIO chuan a chháng. Kum 2022-23 atana MSHCS-a chhungkaw inziak lut zat pawh May 16, 2022 thleng hun hawn a nih avangin hriat theih a la nih loh thu tarlan a ni bawk.