Dy. CM-in SIPMIU project a bawhzui ; Water Treatment Plant thar 96% zo tawh

UDPA changtu deputy chief minister Tawnluia chuan nimin khan New Delhi-ah Ministry of Housing and Urban Affairs secretary Manoj Joshi chu a pisaah a kâwm a, SIPMIU project a tâwp tak avanga Mizoramin harsatna a tawhte a thlen.

Dy. Chief Minister chuan, SIPMIU project chu March 2022-ah a tàwp avangin Aizawl khawpuiin hnianghnâr zawka tui a hmuh theihna tura project kalpui mek, Augmentation of Water Supply and Construction of 37 MLD Water Treatment Plant chu laklawh taka a awm thu a sawi a, "He project hi Aizawl khawpui tuia châwmna atan thil pawimawh tak a ni," tiin, siam zawhna tur sum Mizoram sorkarin a hmuh ngei a beisei thu a sawi.

Tawnluia hian Manoj Joshi hnenah hian SBM 2.0 leh AMRUT 2.0 hnuaia Mizoram sorkarin hmalak an tum dan a thlen bawk a, ministry-in chak taka hma a lâkpui a ngaih thu a hrilh.

Ministry of Housing and Urban Affairs Secre­tary chuan, 37 MLD Water Treatment Plant atana sum la mamawhte chu pek ngei an tum thu Dy. CM Tawnluia a lo hrilh a; SBM 2.0 leh AMRUT 2.0 atan pawh theihtawp an chhuahzel tur thu a sawi.

Deputy Chief Minister hi Delhi Mizoram House additional resident commi­ssioner Alexander V Chongthu-in a ṭawiawm a ni.

SIPMIU official-te hnen aṭanga thu dawn danin, Tlawng lui Setlak chhuah aṭanga Aizawl khawpui châwmtu tur tui lakna, 37 MLD Water Treatment Plant chu hna thawh tur zinga 96% vel thawh zawh a ni tawh a, kumin chhungin siam zawh hman beisei a ni.

Tun dinhmuna la siam zawh loh langsar tak chu rising main an tih, Vaivakawn kâwn laia pipe lian phûm a ni a; pipe phûmna turah hian harsatna hrang hrang an tawh ṭhin rualin, tunah chuan harsatnate chu an paltlang zo thawkhat tawh a ni.