Save Mizoram Rivers-in lui humhalh an tum
Mizorama lui hrang hrangte dinhmuna lungawi lo, humhalh ṭul ti mi eng emaw zat an awm mek a, tun hnai khan lui hrang hrangte humhalh tur pawl, Save Mizoram Rivers an din.
Hmasawnna hrang hrang vangte leh leivûng leh bawlhhlawh paih dan fel lo vanga Mizorama lui pawimawh tak takte a bawlhhlawh nasat tawh bakah, lui tui kám zel veitute chu tun hnai khan Pachhunga University College (PUC)-ah an inhmu khawm a, a ṭul anga hma la turin Save Mizoram Rivers an din a ni.
Inhmuh khawm hi PUC principal Prof. H Lalthanzara'n a kaihruai a, LPS Special Report buaipuitu Vanneihthanga Vanchhawngin Tlawng lui dinhmun leh humhalh a ṭul dan tlangpui sawiin, "Mizoram lui leh tuihnâ te, a bikin Mizoram khaw tam takin tuiin tur an lâkna Tlawng humhalh tura hma latu pawl a awm a ṭul tih a ni a, chumi chungchang sawiho turin inhmuh khawmna hun buatsaih a ni," a ti.
Kumin April 20 leh May 5 inkara Zobawk aṭanga Bairabi thleng Tlawng lui zawh chhuaktu Romalsawma Hmar chuan, "Tlawng fintu lui hmun thuma ṭhena hmun hnih chu ṭhál laiin a kang chat. Chu'ng lui hnâr lamah ngaw ṭha a awm tawh meuh lo," a ti a, Tlawng chu mi tam takin eizawnna atana an hman avangin chhan chhuah a ṭul thu a sawi.
Lalnunmawia Chuaungo, IAS (Rtd.) pawhin thu sawiin, Mizorama lui humhalh a ngaih dan leh sorkar hmalak dan tlangpui a sawi a, "Mizoram sorkarin Tlawng venhim nan leh Mizoram lui dangte leh lei chhunga tui vawnhim nan bill pahnih a buatsaih mek. State sorkarin dan ṭha leh changtlung tak a siam ngei nan a ṭul anga rawtna siam leh sorkar hmalakna bengkhawn zui a ṭul," a ti.
PUC-a kalkhawmte chuan, fûr a nih ṭan tawh avangin Aizawl khawpui tui lâkna Reiek kai Tlawng panna kawngpui sira leivûng leh bawlhhlawh paih tam lutuk chu ngaimawh hmasak ṭha an ti a; Tlawng fintu Tuithûm hnár lama leivûng leh bawlhhlawh nasa taka paihte rang taka tihtawp a nih theih nan hmalak nghal an tum.
Kalkhawmte chuan hruaitu mawhphurhna siam rem ṭha an ti a; convener-ah Vanneihthanga, co-convener-ah Prof. H Lalthanzara leh Vanlalruata (CYMA president hlui), secretary-ah Dr K Vanlaldinpuia leh joint secretary-ah Vanlalhrima te an ruat a ni.
Vanglaini palai zawhna chhangin Vanneihthanga chuan, Tlawng lui chu humhalh a ngai tak zet tih sawiin, "Bawlhhlawh tinrêng a luang lut. Hmun hnihah gate siamin, engtik lai pawha duty dah ni se, leivûng leh bawlhhlawh paih turte chu vên theihah kan ngai a, sorkarah kan thlen ang. Khapna thupek chhuah ringawta kenkawh si loh hi awmzia a awm lo," a ti.
Vanneihthanga sawi danin, Tlawng kam leh a chhehvelah bawlhhlawh leh leivûng paih sorkarin khap mah se, paih an awm reng a, man leh hrem an awm ngai lo a ni.
Tlawng lui kam vela ramte chu mimal ta a nih deuh vek tawh thu sawiin Vanneihthanga chuan, "He thil hi chu law court lama kal ngai tur chi a ni a, Legal unit pawh kan din a la ṭul ang," a ti.
Kawng laih mekin lui tui a tihbawlhhlawh nasat thu sawiin Vanneihthanga chuan, "Hei pawh hi kan ngaimawh khawp mai. Duh duhna hmuna leivûng nem liam ngawtte hi thil dik a ni lo," a ti a; a tahtawla hmalakna tur a inchhawp hnem thu a sawi a ni.