BJP President-in union minister 2 a kâwm

BJP, Mizoram Pradesh president Vanlalhmuaka chuan May 22, Pathianni zan khan Fisheries, Animal Husbandry and Dairy minister Parshottam Rupala chu New Delhi-a a chenna inah a hmu a, Mizoram mamawh hrang hrang a sawipui.

Mizoram BJP thuchhuah tarlan danin, Vanlalhmuaka chuan, vawk pûl hri léng avangin Mizorama vawk vulhtute'n vawk an chàn nasat thu sawiin, hri vanga vawk thi neitute'n zangnadawmna an hmuh ngei theih nan hma lakpui turin Parshottam Rupala a ngen a; Mizoram chu vawk saa a intodelh theih nan hma lâkpui tur leh sangha khawi leh ran vulh lamah hma lâkpui turin a ngen bawk.

Parshottam Rupala chuan, Mizorama vawk vulhtute'n hri vanga harsatna an tawh chungchangah Mizoram sorkarin a lo thlen tawh angin ṭanpui zel a tum thu Mizoram BJP President a lo hrilh a; vawk vulhtute'n zangnadawmna an dawn chungchang chu en zui turin a chah nghal a ni.

Mizoram BJP President hian nimin khan Railways leh Textiles minister of state Darshana Jardosh chu a pisaah a kâwm bawk a; Darshana Jardosh chuan, Mizorama a kal tur chu a phûr thu sawiin, Mizoram a tlawh hunah a ministry hnuaia hmalaknate leh an dinhmun enfiah a, theihtawp chhuaha puih a tum thu a lo hrilh.

Vanlalhmuaka hian Mizorama Railways hnathawh dan tlangpui leh Textiles industry lama Mizoram dinhmun a sawi a; Thenzawla puan tahna hmunpui a tlawh tur chu lawmawm a tih thu a sawi rualin, Sericulture lama Mizoram mamawhte pawh enpui turin a ngen a ni.