Kum 2023-ah ZPM sorkar an rin thu mipuiin an sawi nasa - Sapdanga

ZPM working presi­dent K Sapdanga chuan, Mizoram hmun hrang hranga an kal velna apiangah kum 2023-ah chuan mipuiin ZPM an sorkar an rin thu an sawi huai huai tawh niin a sawi.

Nimina ZPM pisaa inkhawmah thu sawiin K Sapdanga chuan, ZPM chu mi sáwm khawm thiam lo ber an ni chungin an hotute zin chhuahna khaw tinah mi tam takin an lo hmuak a, mi tam takin ZPM an zawm zel niin a sawi a, "Mizoram chhim leh hmar, chhak leh thlang, kan kal velna apiangah kum 2023-ah chuan mipuiin ZPM sorkar an rin thu an sawi huai huai tawh a ni," a ti.

ZPM Working Presi­dent chuan, Mizoramin politics rahbi chhe tak a rah mek thu sawiin, "Mahni dikna chanvo puang chhuak ngam mang lo khawpa inrahbehna a awm a, hei hi kalphung thar din kan mamawh chhan pakhat a ni," a ti a; ZPM inkaihhruainaah politics khelh dan thianghlima khelh tur tih a awm tih sawiin, "Kan ni tin khawsak phungah thianghlim leh felfai taka politics kalpui a ngai a, sakhua leh politics hi dik leh ṭha takin a kal kawp thei a ni," a ti bawk.

ZPM thuchhuah chuan, ZPM Working President hian ZPM zawm thar mi 64 a lawm lût niin a tarlang.