KHAWTHLIR

Lawngtlai DC thar
Lawngtlai district bawrhsap thar Amol Srivastava, IAS chuan May 20, 2022 khan bawrhsap mawhphurhna a la ṭan a, DC kal chhuak Dr Andrew H Vanlaldika a thlâk. DC thar chuan, Lawngtlai district hmasawn nan theihtawp chhuah a tum thu a sawi. Amol Srivastava hi IAS, 2018 batch, AGMUT cadre a ni a, Mizoram sorkara Commerce & Industries department leh Taxation department additional secretary aṭangin Lawngtlai DC-ah sawn a ni.

SGA president
Kolasib district bawrhsap John LT Sanga chu Kolasib District Scouts & Guides Association president atan nimin khan district commissioner (rover) Lalrambuatsaiha'n a la lut.

Aapda Mitra hawng
Sports & Youth Services minister Robert Romawia Royte chuan nimin khan Tanhrila State Training Centre-ah 'Upscaling Aapda Mitra scheme for Mamit district' a hawng. Aapda Mitra training hi chawlhkar hnih awh tur a ni a, chhiatna a thlena lawmman phût loa ṭanpuitu ni tura inzirna a ni.

MLA-in sana pe
Aizawl North-III bialtu MLA C Lalmuanpuia chuan nimin khan a bial Aizawl North-III chhunga two wheeler taxi stand hrang hranga dah tur sana lian eng emaw zat a pe.

Helipad enfiah
Siaha DC Lalsangliana chuan Civil Aviation aṭanga ngenna a hmuh angin nimin khan Siaha Helipad a endik a, Siaha SP office, PWD, PHE, Power & Electricity, Fire & Service, LAD leh MADC aiawhte'n an ṭawiawm. Helipad leh a chhehvela bawlhhlawh thenfai dan tur, gate leh chawlhna in thawm ṭhat dan tur, helicopter ṭumna sawn leh siamṭhat dan tur, helipad him leh thianghlim zawk neih theih dan turte an enho a ni.