MNF sorkar lehna tur hi sum leh pai leh zin tamah a innghat lo - Dr Thangtea

MNF adviser Dr R Lalthangliana, minister chuan, social media-a Chief Minister leh minister dangte beihnate avanga chî-âi lo turin an party mite a chah a, MNF an sorkar lehna tur chu sum leh pai leh zin tamah a innghah loh thu a sawi.

Nimina Mizo Hnam Runa inkhawmah thu sawiin Dr R Lalthangliana chuan, social media-ah CM Zoramthanga leh minister dangte beihna hrang hrang a tam tih a sawi a; mi ball vawma buaia chî-âi lo tur leh a tak ram hre turin minister leh MLA-te zawt mai turin a chah a ni.

Dr R Lalthangliana chuan, nakina an tu leh fate tana chhawr theih tur chu an ngaihtuah ber a ni tih sawiin, "Dik tak leh rinawm taka awmin Lalpa lâwm zawng hi MNF-te'n kan tih tur a ni a, kan sorkar lehna tur hi sum leh pai, zin tamah a innghat lo a, tling leh tlaka Lalpa mithmuha kan awm a ngai a ni," a ti.

Kum hnih leh a chanve vel Covid-19 hripuiin a tihbuai thu sawiin R Lalthangliana chuan, "Health depart­ment-ah sorkar hmasa khan hna lak a nei mumal lo a, Health bikah post ruak 3,000 dáwn kan nei mek. Kan sorkar tirh khan post ruak 734 la turin cheng vbc. 50 kan dah a, Finance pawhin min approve tawh a, Covid avangin kan la thei ta lo a ni," a ti a; loh theih loh avanga Health department-a hna ruak hnawhkhat turin tun hnaiah CM, Finance, Planning leh DPAR hotute nen an rêl thu a sawi.

Covid-19 donaah Mizoram chu a thawk ṭha a, India ram leh khawvel hmun dangah Mizoram anga hma la ṭha an awm ve lo angin mi dangin an sawi ṭhin thu sawiin R Lalthangliana chuan, "Covid avanga thi mi 698 hi chhûtin India ramah kan thi tlem ber a. Thi zinga 80% chu natna benvawn nei, cancer, BP sang, lung ná leh natna serious tak tak vei sate an ni a, Covid thihpui tak chu thi zinga 20% vel a ni ang," a ti.

MNF Adviser chuan, hriselna lama hmasawnna turin tun hnaiah Texas, USA-ah a kal thu leh khawvel hmun danga health minister zingah dàwr ve an awm a rin loh thu a sawi a; tun hnaiah Gujarat-ah India ram state hrang hrang health minister meeting-a a telnaah health minister zinga MLA tling ngun ber a nih avangin chawhma inkhawm a kaihhruai thu a sawi bawk.