School Education department-ah thawktu Mi 2,000 chuang lâk a ni tawh - Chhantea

School Education minister Lalchhandama Ralte chuan, hripui a lêng chungin School Education department-ah thawktu mi 2,000 chuang lâk a ni tawh tih a sawi.

Minister Lalchhandama Ralte hian nimina Mizoram Middle School Teachers Association (MSTA) silver jubilee lawmna a hmanpuinaah thu sawiin, "Kan sorkar hian zirna a ngai pawimawh em em a, hri lêng avanga sum lama harsatna kan tâwk chung pawhin zirnain hma a sawn zel theih nan kawng hrang hrangin hmalak a ni a, thawktu mi 2,000 chuang lak a ni tawh," a ti.

Sorkar sikulah lut duh an pung zel nia sawiin Lalchhandama chuan, "Hmun ṭhenkhatah phei chuan dawhkante siam belh hial a ngai a ni," a ti a; zirna lama hma an lak theih nan zirtirtute chu anmahni sum sénga kawng hrang hranga hma an la ṭhin chu chhuanawm a tih thu a sawi.

Education Minister chuan, hripuiin a tibuai chungin bahlah miah loin zirna lama hmalaknaah harsatna tâwk loin a hun takah result an tichhuak thei ṭhin leh chawchhun pawh khaihlak miah loa sem a ni thei ṭhin chu lawmawm a tih thu a sawi bawk.

Minister hian zirnain hma a sawn zel theih nan hma an laknaa thurawn pea finchhuah zel turin MSTA member-te a sawm a, MSTA silver jubilee Jubilee lungphun a hawng nghal a ni.

MSTA silver jubilee hi Teachers Inn-a MSTA Office-ah lawm a ni a, MSTA president Rosangzuala Ralte-in kaihruaiin, khualzahawm Dr H Lalthlangliana, School Education director pawhin thu a sawi.

MSTA-ah hian member 1,376 an awm mek a ni.